लोक सेवाले गर्यो २० नक्कली परीक्षार्थीलाई कारबाही

८ वैशाख, काठमाडौं । लोक सेवा आयोगले २० नक्कली परीक्षार्थीलाई कारबाही गरेको छ । आयोगले संचालन गरेको प्रहरी जवान पदको लिखित परीक्षामा सहभागी भएका २० नक्कली परीक्षार्थीलाई कारबाही गरेका हो ।

उनीहरुले परीक्षामा नागरिकता र प्रवेशपत्रको फोटो नै परिवर्तन गरी परीक्षामा सहभागी भएको खुलेपछि आयोगले कारबाही गरेको हो । गत फागुन २२ गते कञ्चनपुर, महेन्द्रनगर र दिपायलबाट लिइएको परीक्षामा नक्कली परीक्षार्थी सहभागी भएको खुलेको हो ।

आयोगले उनीहरुलाई लोक सेवा आयोगले लिने सबै प्रकारका परीक्षामा पाँच वर्षसम्म सहभागी हुन नपाउने गरी निलम्बन गरेको छ भने उनीहरुलाई प्रचलित कानुनबमोजिम अनुसन्धान गरी आवश्यक कारबाही गर्नका लागि नेपाल प्रहरीलाई लेखी पठाउने निर्णय पनि गरेको छ ।

महेन्द्रनगरस्थित सिद्धनाथ विज्ञान क्याम्पस परीक्षा केन्द्रमा आठ जना तथा शान्ति निकेतन मावि र अमिती कलेजमा तीनरतीन जना नक्कली परीक्षार्थी फेला परेका छन् । अन्य परीक्षार्थी बालजागृती मावि, जानकी कन्या मावि र दिपायलमा फेला परेका हुन् ।