अब आयोगले स्टिङ अपरेशन गर्न नपाउने

८ वैशाख, काठमाडौं । ठूला माछा उम्काएर साना माछा मात्र पक्राउ गर्न स्टिङ अपरेशन गर्दै काम देखाउने गरेको अख्तियार दुरुपयोग अनुसन्धान आयोगलाई अबदेखि स्टिङ अपरेशन नगर्न सर्वोच्च अदालतले आदेश जारी गरेको छ ।  अदालतले बुधबार स्टिङ अपरेशनबारे परेको रिटमा निवेदकले माग गरेबमोजिम आदेश गरेको हो ।

अधिवक्ता विष्णुप्रसाद घिमिरेले दिएको निवेदनमा अख्तियारको स्टिङ अपरेशन खारेज गर्न माग गरिएको थियो । प्रधानन्यायाधीश चोलेन्द्रशमशेर राणासहित पाँच जना न्यायाधीश रहेको संवैधानिक इजलासले बुधबार यस्तो आदेश गरेको सर्वोच्चका सूचना अधिकारी देवेन्द्र ढकालले बताए ।

बुधबार प्रधानन्यायाधीश चोलेन्द्रशम्शेर जबरा, न्यायाधीशहरु दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडासहितको संवैधानिक इजलासले स्टिङ अपरेशन रोक्न रिट जारी गरिदिएको छ ।

आयोगले सरकारी कार्यालयमा घुस रकमसहित पक्राउ गर्न स्टिङ अपरेशन गर्दै आएको थियो । अख्तियारले यस्तो ‘स्टिङ अपरेशन’ आफ्नो नियमावलीका आधारमा गरिरहेको थियो । उक्त नियमावलीको नियम ३० मा घुस र रिसवत वापत रकम उपलब्ध गराउन सक्ने प्रावधान छ ।