संक्रमणका कारण वीरगञ्ज नर्सिङ कलेजमा भान्छेकाे मृत्यु

९ वैशाख, वीरगञ्ज । वीरगञ्जमा ६१ वर्षीया महिलाको कोरोना भाइरस संक्रमणका कारण मृत्यु भएको हो । वैशाख ७ गते नारायणी अस्पतालमा भर्ना भएकी वीरगञ्ज– १६ बस्ने उनको बिहीबार बिहान सवा १ बजे मृत्यु भएको नारायणी अस्पतालले जनाएको हो ।

वैशाख ३ गते नै उनमा कोरोना संक्रमण पुष्टि भएको थियो । हाइफ्लो अक्सिजन दिएर समेत उनलाई बचाउन नसकिएको अस्पतालले जनाएको छ । ती महिला वीरगञ्ज नर्सिङ कलेजमा भान्छेको रुपमा कार्यरत थिइन् ।

वैशाख ३ गते तीन जना भान्छेमा कोरोना संक्रमण पुष्टि भएको थियो । उनीहरुलाई होम आइसोलेसनमा राखिएको थियो । वीरगञ्ज नर्सिङ कलेजका २७ जनामा कोरोना संक्रमण पुष्टि भइसकेको छ ।

नारायणी अस्पतालमा ३१ जना कोरोना संक्रमितको उपचार भइरहेको छ । उनीहरुमध्ये २९ जनालाई अक्सिजन दिएर राख्नुपरेको अस्पतालले जनाएको छ ।