आज पनि नेपाल समुहका सांसद छलफलमा

९ वैशाख, काठमाडौं । माधव-झलनाथ पक्षका सासद्‍हरू छलफलमा जुटेका छन्। बुद्धनगरस्थित सहाना प्रधान प्रतिष्ठानमा उनीहरु केहीबेर अघिदेखि छलफलमा जुटेका हुन् । पार्टी अध्यक्ष एवं प्रधानमन्त्री केपी ओलीले तीनदिन भित्र बुझाउन भन्दै स्पष्टीकरण सोधेपछि आफूहरू थप रणनीति बनाउन छलफलमा जुटेको स्रोतलले जनाएको छ ।

यसअघि स्पष्टीकरण सोधिएको दिन पनि माधव-झलना पक्षले छलफल गरेको थियो। एक्लाएक्लै स्पष्टीकरण सोधिएकाले जवाफ पनि त्यसै अनुसार दिने उक्त पक्षको रणनीति छ। आजको छलफलले थप केही निर्णय गर्नसक्ने बताइएको छ।

हिजो साँझ मात्र नेकपा एमालेका अध्यक्ष ओली र वरिष्ठ नेता माधव नेपालबीच लामो समयपछि वार्ता भएको थियो । काठमाडौंको नक्सालस्थित होटेल मेरियटमा भएको करिब २ घण्टा लामो वार्तामा सकारात्मक भएको बताइएको छ ।

बुधबार मात्र ओलीले फागुन २८ पछि गरेका सबै काम खारेज गर्न माग गर्दै नेपाल पक्ष सर्वोच्च पुगेको थियो। तर उसले दायर गरेको रिट भने दर्ता भएको छैन। सोही दिन हिजो दिउँसो नेपाल पक्षका नेता योगेश भट्टराईले ओलीसँग भेट गरी वार्ताबाट अघि बढ्न सुझाव दिएका थिए। लामो समयको रस्साकस्सीपछि भएको ओली र नेपालबीचको वार्तालाई महत्वका साथ हेरिएको छ।

यता पार्टीमा देखिएको विवाद समाधान बारे असन्तुष्ट नेता माधवकुमार नेपालसँगको वार्तापछि प्रधानमन्त्री एवं एमाले अध्यक्ष ओलीले आफू पक्षीय नेताहरूसँग छलफल गरेका छन् ।

ओली र नेपालबीच बुधबार साँझ भएको वार्तामा के भयो भन्ने यकिन विषय सार्वजनिक भएको छैन। तर, नेपालसितको छ्लफल लगत्तै बालुवाटार पुगेर ओलीले आफू निकटका नेताहरूसँग छ्लफल गरेका हुन्। स्रोतका अनुसार नेता नेपालले पनि आफू निकट केही नेताहरूलाई प्रधानमन्त्री एवं पार्टी अध्यक्षसँगको वार्ताका बारेमा जानकारी गराएका थिए।