जाेखिम बढेसँगै उपत्यकाका २ दर्जन ठाउँमा चेकिङ

९ वैशाख, काठमाडौं । कोरोना भाइरसकाे दाेस्राे लहरमा संक्रमण बढ्दै गएसँगै सार्वजनिक यातायातमा कडाइ गरिएको छ। सार्वजनिक यातायातमा सिट क्षमताभन्दा बढी यात्रु चढाउन नपाउने गरी नयाँ स्वास्थ्य मापदण्ड जारी गरेको हो।

साथै संक्रमण बढ्दै गएपछि सार्वजनिक यातायात चढ्ने सबैले अनिवार्य मास्क लगाउनु पर्ने भएकाे छ । साथै मापदण्ड अनुसार सवारीसाधनको ढोकामा र भित्र स्यानिटाइजरको व्यवस्था पनि गर्नुपर्ने छ।

सरकारले जारी गरेकाे मापदण्डमा चालक र सहचालकले मास्कका साथै भाइजरसमेत लगाउनुपर्ने छ। तर, अहिले काठमाडौं उपत्यकाभित्र चल्ने सवारीसाधनमा यस्तो मापदण्ड पालना गरेको देखिदैन । यता जाेखिम बढेसँगै महानगरीय ट्राफिक प्रहरी महाशाखाले उपत्यकाका दुई दर्जन ठाउँमा चेकिङ प्वाइन्ट राखेको छ।

महाशाखाले नयाँबजार, पुरानो बसपार्क,कमलपोखरी, कलंकी चोक, सीतापाइला,एकान्तकुना, बल्खु लगायतका विभिन्न स्थानमा चेकिङ राखेको छ। सार्वजनिक यातायातमा चढ्ने यात्रुले मास्क नलगाइ आएमा सवारीसाधनमा नै बढीमा १० रुपैयाँ लिएर यात्रुलाई मास्क उपलब्ध गराउनुपर्ने छ। ट्राफिक प्रहरीले अन्य स्थानमा समेत आकस्मिक चेकिङ गर्ने जनाएको छ।