ओली प्रभावशाली नेताहरुलाई तान्ने रणनीतिमा

९ वैशाख, काठमाडौं । झण्डै डेढ महिनाको सम्बादहिनतापछि हिजो दिउँसो प्रधानमन्त्रीसमेत रहेका एमाले अध्यक्ष केपी ओलीले कारबाही भोगिरहेका नेता माधवकुमार नेपाललाई भेट्न बालुवाटार बोलाए । तर नेता नेपालले बालुवाटार नआउने अडान लिए । त्यसपछि ओलीले त्यसो भए नक्सालस्थित एउटा होटलमा भेट्न प्रस्ताव गरे । नेता नेपालले स्वीकार गरे ।

साँझ करिव पौने ६ बजे नेता नेपाल होटल पुगे । लगत्तै प्रधानमन्त्री ओली पनि आइपुगे । दुई घण्टा ओली र नेपाललाई ढोका थुनेरै राखियो । लामै कुरा भए । करिव ८ बजे वार्ता सकियो । नेताहरुले प्रतिक्रिया दिएनन् । तर राजनीतिक वृत्तमा हल्ला फैलाइयो – एमाले फेरि एकढिक्का हुने भयो । पूर्व मन्त्रीसमेत रहेका नेपाल पक्षीय नेता गोकर्ण विष्टले सामाजिक सञ्जालमा लेखे– कालो बा्दलमा चाँदीको घेरा हुने रहेछ । अब पार्टीमा नयाँ उत्साह सञ्चार हुने भयो ।

तर साँझै नेता नेपालले आफूनिकट नेताहरुलाई खासै सकारात्मक वातावरण नबनेको जानकारी दिएका थिए । आज बिहान प्रधानमन्त्री ओलीले बल्खुमा पार्टी कार्यालयको शिलन्यास गर्दै दिएको मन्त्व्यले पनि त्यही संकेत ग¥यो । ओलीले भने– नेपालहरु अहिले पनि गुटबन्दीमै छन्, तर गुटबन्दी छाडेर आउने हो भने क्षमताका आधारमा जिम्मेवारी दिन सकिन्छ ।

गुटबन्दीले पार्टी ध्वस्त बनाएको र नेपालहरुले देशैभरि नयाँ पार्टी गठन गरेर एमालेको झण्डा र चुनाव चिह्नको दुरुपयोग गरेको आरोपसमेत लगाए । ओलीले प्रष्टै भनेका छन्–सकेसम्म पार्टी नफुटोस् भनेर मनाउने प्रयास गर्दैछौं मानेनन् भने विधि र प्रकृया अनुसार कारबाही हुनेछ ।
सिता एमालेको खाने गीता माओवादीको गाउने ? त्यो सैह्य छैन भन्दै ओलीले समयमै सच्चिएर आए पार्टीमा क्षमता अनुसार जिम्मेवारी दिइने नभए बाटो लागे हुन्छ ।

ओलीका यी वचनले हिजोको भेट केवल देखावटी मात्र भएको प्रष्ट हुन्छ । उनी चाहन्छन् – दुनियाँले ओलीले त पर्याप्त मौका र अवसर दिएको तर नेपालहरुले नै नचाहेका रहेछन् भन्ने सन्देश जाओस् । त्यही देखाउन उनले हिजो नेपाललाई भेट्ने नाटक मञ्चन गरेका थिए । नेता नेपाललाई भेट्न योगेश भट्टराईले जोडबल गरेका थिए ।

स्रोतका अनुसार, योगेश र गोकर्णहरु पनि अब ओली पक्षमा जान तयार भएका छन् । त्यसका लागि एकपटक ओली लचक भएको सन्देश जाओस् भन्ने मात्र चाहन्थे । त्यसैका लागि ओलीले हिजो नेता नेपाललाई भेट्न बोलाएका थिए । नत्र दुई घण्टासम्म दुबै नेताबीच वान टू वान टक हुँदा समेत केही सहमति बन्न किन सकेन त ? कारण त्यही थियो । ओली अरुलाई देखाउनका लागि मात्र यस्तो भेट गर्न चाहन्थे ।

योगश र गोकर्णहरुलाई ओली क्याम्पमा फर्काउन सजिलो होस् भनेर मात्रै हिजोको भेटघाटको नाटक गरिएको कुरा नेता नेपालले पछि मात्रै बुझे । त्यसको संकेत आज बिहान बुद्धनगरस्थित साहना प्रधान स्मृति प्रतिष्ठानमा नेता नेपालले गरे । निकट नेताहरुलाई बोलाएर उनले यसबारे छलफल गरे । उक्त छलफलमा योगश र गोकर्ण उपस्थित छैनन् ।

बिहानको छलफलमा नेता नेपालले हिजो साँझ ठोस प्रस्ताव वा विषयमा छलफल नगरिएको बरु ओलीले आफ्ना गुनासा मात्रै पोखेको जानकारी दिए । यति गर्नका लागि किन बोलाइयो भनेर बुझ्नै गाह्रो भएको प्रतिक्रिया नेता नेपालले दिए । ओलीको यो शैली र प्रवृत्तिले नेपाललाई गलाएको देखिन्छ । ओली सत्तामा रहुञ्जेल नेपालको राजनीतिक शक्ति क्षयीकरण हुने अनुमान गरिएको छ । नेपालसँग रहेका नेताहरुलाई ओलीले व्यक्तिगत रुपमै डिल गरेर आफूतिर तान्न सफलता पाइरहेका छन् । यही क्रमको श्रृँखलाका रुपमा अहिले योगश र गोकर्णहरु आइपुगेका छन् ।

यसअघि मात्रै नेता नेपालका ज्यादै निकट मानिने केन्द्रीय सदस्य विष्णु रिजालसमेत ओली गुटमा प्रवेश गरिसकेका छन् । अब विस्तारै अरु प्रभावशाली नेताहरुलाई समेत आफूतिर तान्ने रणनीति ओलीले बनाएका छन् । ओली चाहन्छन्–माधव, झलनाथ, भीम रावल , घनश्याम र सुरेन्द्र पाण्डे बाहेक सबै आफूतिर आउन् । त्यसैका लागि यो प्रपञ्च रचिएको हो । बालुवाटार निकट स्रोतका अनुसार, भोलि हुने केन्द्रीय कमिटी बैठकमा योगेश , गोकर्ण लगायत नेताहरु सहभागी हुने छन् । सोही बैठकबाट केही नेतालाई थप कारबाही गरिने छ ।