बीमा कम्पनीहरुको सेवालाई निरन्तरता दिन बीमा समितिको निर्देशन, सजगता अपनाउन आग्रह

९ बैंशाख, काठमाडौं । नेपालमा कोभिड १९ को दोस्रो लहर सुरुभएपछि बीमा कम्पनीहरुलाई सजगता अपनाउन बीमा समितिले निर्देशन दिएको छ ।

समितिले संक्रमणको जोखिमलाई न्यूनीकरण गर्न आवश्यक स्वास्थ्य सर्तकता सहित बीमा कम्पनीहरुको सेवालाई निरन्तरता दिन निर्देशन दिएको हो ।

समितिले प्रत्यक्ष सम्पर्कमा रहने जनशक्ति तथा सेवाग्राहीमा सम्भावित संक्रमणको जोखिमलाई न्यूनीकरण गर्न तत्काल अपनाउनुपर्ने सावधानी स्वरुप मास्क,साबुन, पानी र सेनिटाइजरको अनिवार्य रुपमा व्यवस्था गर्न बीमा कम्पनीहरुलाई निर्देशन दिएको छ ।

भौतिक दुरी कायम गरी भीडभाड नहुने गरी सेवाग्राहीलाई सेवा प्रवाह गर्न व्यवस्था मिलाउन, सेवाग्राहीको आवतजावत कम हुनेगरी यथासम्भव विद्युतीय माध्यमको व्यवस्था गर्न पनि निर्देशन दिएको छ ।

यस्तै बीमा कम्पनीहरुले सञ्चालन गर्ने बैठक, अभिकर्ता तालिम, सेमिनार जस्ता कार्यक्रमहरु भौतिक दुरी कायम गरी अत्यावश्यक सम्पर्क गर्नुपर्ने अवस्था वाहेक अन्य समयमा विद्युतिय माध्यमर भच्र्युअल माध्यमबाट गर्न जोड दिएको छ ।

कर्मचारीहरुको कार्य विभाजन गरी कार्यालय समयमा सकेसम्म कम कर्मचारीहरु उपस्थिति गराई सेवा प्रदान गर्ने व्यवस्था मिलाउन पनि निर्देशन दिएको छ ।