ओलीको भड्काउ चिन्तनले कम्युनिस्ट आन्दोलन धरापमा : नेपाल

१० वैशाख,जनकपुर । नेकपा एमालेका नेता माधवकुमार नेपालले ओलीको भड्काउ चिन्तनले कम्युनिस्ट आन्दोलन धरापमा परेको बताएका छन् । शुक्रबार जनकपुरधामस्थित नेकपा पार्टी कार्यालय मिथिला भवनमा आयोजित पत्रकार सम्मेलनमा बोल्दै नेता नेपालले ओली वायुपंखी घोडा चढ्दा पार्टी र लोकतन्त्र संकटमा परेको बताएका हुन् ।

नेपालले कार्यक्रममा बोल्दै भने ‘पार्टी फुट्न नदिन पटक–पटक भेटघाट गरे पनि ओलीको हठका कारण सफल हुन सकिएन,’छलफल र भेटघाटमा ओली आफनो दम्भबाट पछाडि हट्न चाहेन ।’ पार्टीलाई एकताबद्ध बनाएर अगाडि बढाउन भेटघाट भए पनि छलफल सकारात्मक हुन नसकेको उनले बताएका छन् ।

उनले ओलीको दम्भ काठमाडौंको धरहराको उकालो जस्तै चढ्दै गरेको आरोप लगाएका छन् । आज ओलीको भड्काउ चिन्तनका कारण पार्टी, मुलुक, लोकतन्त्र नै संकटमा परेको उनले बताएका छन् । ओली अल्पमतमा परेपछि बाटो हिँड्ने बटुवालाई केन्द्रीय सदस्य बनाएको पनि उनले बताएका छन् ।

त्यस्तै नेपालले पार्टीमा बहुमत रहेकोले ओलीले कारबाही गर्दैमा पार्टी नफुट्ने बताएका छन् । उनले नेकपा एमालेको एकता बचाउन र कम्युनिस्ट आन्दोलनको रक्षा गर्न राष्ट्रिय कार्यकर्ता भेलामा राजनीतिक प्रस्ताव गरेको बताउँदै फागुन २३ पछिका दस्तावेजहरु समेटर अभियान, एकता प्रयास र कारबाहीबारे निकालेको पुस्तकले कार्यकतामा रहेको भ्रम समाप्त हुने बताएका छन् ।

वरिष्ठ नेता नेपालले पार्टी अध्यक्षले आफूलाई कारवाही गरेकोबारे विचार गर्न सकिने छ भनी जाली कुरा मात्र गरेको भन्दै २७ जना प्रतिनिधिसभा सदस्यसँग माग गरिएको स्पष्टीकरण औचित्यहीन छ भने । प्रावधानअनुसार पार्टी अध्यक्षलाई २७ संसद्को पद खोस्ने कुनै आधार नरहेको स्पष्ट गर्दे उनले आफूहरूको मूल घर नेकपा ( एमाले) नै हो, पार्टी अध्यक्षको दम्भ धरहराभन्दा माथि चढिसकेका कारण अध्यक्षले सुधार गर्नुपर्दछ भने । उनले पार्टी अध्यक्ष आफूलाई सर्वज्ञानी ठान्ने गरेका कारण सबैतिर त्राहिमामको अवस्था उत्पन्न भई पाटीको गतिविधि कागजमा सीमित हुन पुगेको प्रसङ्ग उल्लेख गरे ।