प्रचण्ड र माधवका कारण पार्टी विभाजन : ओली

१० वैशाख, काठमाडौं । नेकपा एमालेका अध्यक्षसमेत रहेका प्रधानमन्त्री केपी ओलीले पुष्पकमल दाहाल प्रचण्ड र माधवकुमार नेपालको महत्वाकाँक्षाले गर्दा वामआन्दोलन तहसनहस भएको आरोप लगाएका छन् ।

आफ्नै सरकारी निवास बालुवाटारमा आज बोलाइएको पार्टी केन्द्रीय कमिटी बैठकलाई संवोधनगर्दै अध्यक्ष ओलीले भने– कति दुख र कष्टका साथ मैले वामहरुको गठबन्धन र पार्टी एकीकरण गरेको थिएँ, तर माधव र प्रचण्डको पदलोलुपताले सबै ध्वस्तभयो ।

झण्डै दुई तिहाईको वहुमतलाई उहाँहरुले बार्गेनिङको अस्त्र बनाउनुभयो, प्रधानमन्त्री र पार्टी अध्यक्ष नभै नहुने गज्जबको व्यावहार देखाइयो – ओलीले भने – ए बाबा दुवै छाड्ने हो, तर प्रकृया अन्तर्गत । पार्टी अध्यक्षका लागि महाधिवेशन र प्रधानमन्त्रीका लागि अर्काे आमनिर्वाचन, त्यति पनि धैर्य नराख्ने ?

फागुन २३ गते सर्वाेच्चले गरेको फैसला प्राविधिक मात्र भएको प्रसंग निकाल्दै उनले भने– हामी त नेकपा रहँदै फुटिसकेका थियौं नि । मलाई साधारण सदस्यता समेतबाट निष्काशन गर्ने कत्रो हतारो ?

प्रचण्ड र माधवजीकै कारण पार्टी फुटेको हो, तर अझै समेट्ने प्रयास गरिरहेको स्मरण गर्दै ओलीले भने–यही प्रकृया अन्तर्गत मैले योगश भट्टराई र माधवजीसँग छलफल गरें, तर उहाँहरुमा कुनै सुधार छैन । पार्टी कब्जा गर्ने मनसायले अब एमालेमा आउनुको अर्थ पनि छैन ।

अहिले पनि आफूविरुद्ध विषवमन गर्ने काम भइरहेको भन्दै उनले नेपाल पक्षसँग गुनासो गरे । यस्तै हो भने किन एकैथलो भात भान्छा गर्ने बरु बाक्लो दाल खाँदा भयो नि त – ओलीले भने ।