स्थायी कमिटीले पायो माधव नेपालसहितका नेतालाई कारबाहीको जिम्मा

१० वैशाख, काठमाडौं । नेकपा एमालेका २७ जना प्रतिनिधिसभा सदस्यहरुलाई कस्तो कारबाही गर्ने भन्नेबारे निर्णय लिन स्थायी कमिटीलाई अधिकार दिइएको छ ।
आज बालुवाटारमा बसेको केन्द्रीय कमिटी बैठकले यस्तो निर्णय गरेको हो ।

तर पाँच जना सांसद्ले भने अझै स्पष्टीकरण बुुझाएका छैनन् । बैठकमा यसबारे जानकारी दिंदै पार्टी अध्यक्ष केपी ओलीले भने– स्पष्टीरण नबुझाउने र बुझाएकाहरुको हकमा के गर्ने भनेर अब स्थायी कमिटीले निर्णय लिने छ ।

स्पष्टीकरण नबुुझाउनेहरुमा योगेश भट्टराई, रामकुमारी झाँक्री, मेठमणि चौधरी, निरा जैरु र दीपकप्रकाश भट्ट रहेका छन् ।

साथै, स्पष्टीकरण बुुझाउनेहरुले समेत तुलनात्मक रुपमा सफ्ट भाषाको प्रयोग गरेको जानकारी अध्यक्ष ओलीले गराएका थिए । सबैका भाषा शैली उस्तै भएकाले बैठक गरी तयार गरेजस्तो देखिएको पनि उनले प्रष्ट पारे ।

बैठकमै ओलीले गणेश पहाडी र हिरा केसीले अब मूलधारमै लाग्ने प्रतिवद्धता जनाएको पनिउल्लेख गरे । साथै, सोमप्रसाद पाण्डे, जयकुमार राई र कल्याणी खड्काले भने सुझावसहितको प्रष्टीकरण दिएको पनि बताए ।