एमालेबाट राष्ट्रिय सभा उम्मेदवार बन्दै बादल

१० बैशाख,काठमाडौं । नेकपा एमालेले नवनियुक्त स्थायी समिति सदस्य रामबहादुर थापा बादललाई राष्ट्रिय सभा सदस्यमा उम्मेदवार बनाउने भएको छ । बादललाई यसअघि नेकपा माओवादी केन्द्रले कारवाही गरेपछि उनको राष्ट्रिय सभा सदस्यको पद गुमीसकेको छ ।

राष्ट्रिय महाधिवेशन आयोजक कमिटीको बैठकमा प्रधानमन्त्री केपी शर्मा ओलीले जेठ ६ गते हुने राष्ट्रिय सभाको उप निर्वाचनमा रामबहादुर थापा बादल नै उम्मेद्वार हुने बताएका हुन् । ओलीले भने, ‘हाम्रो पार्टी तिर लागेका कारणले माओवादीले कारबाहीको नाममा रिक्त बनाएका पदहरू ३५ दिनदेखि ६ महिना भित्र हुने चुनावमा पुनः जिताएर ल्याइनेछ’,।

बिहीबार निर्वाचन आयोगले राष्ट्रियसभाको रिक्त पदका लागि उप निर्वाचनको मिति तोकेको थियो । आयोगले थापाको रिक्त स्थानमा राष्ट्रियसभा सदस्य चयनका लागि जेठ ६ गते निर्वाचनको मिति तोकेको हो ।