कुमारी बैंकको मुनाफा ७८.५८ प्रतिशतले बढ्यो, वितरणयोग्य मुनाफा कति ?

१२ बैशाख, काठमाडौं । कुमारी बैंक लिमिटेडले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार बैंकको मुनाफा १ अर्ब ८० करोड ८४ लाख रहेको छ । जुन गत वर्षको तुलनामा ७८.५८ प्रतिशत बढी हो।

समीक्षा अवधिमा बैंकको ब्याज आम्दानी पनि बढेको छ । सँगै अन्य सञ्चालन आम्दानी बढेका कारण खुद नाफा बढ्न पुगेको हो। चैत मसान्तसम्ममा बैंकको वितरण योग्य मुनाफा ९८ करोड ४६ लाख रुपैयाँ रहेको छ।

समीक्षा अवधिमा बैंकको ब्याज आम्दानी ३९.०४ प्रतिशत बढेको छ भने खुद फि तथा कमिशन आम्दानी ४३.६४ प्रतिशत बढेको छ। त्यसैगरी, बैंकको अन्य सञ्चालन आम्दानी साढे ७ करोडबाट बढेर करिब ३२ करोड रुपैयाँ पुगेको छ। समीक्षा अवधिमा बैंकको सञ्चालन मुनाफा ७४.४१ प्रतिशत बढेको छ। चैत मसान्तसम्ममा बैंकको ५१ लाख रुपैयाँ इम्पेरमेन्ट चार्ज रिभर्स भएको छ।

मुनाफासँगै बैंकको प्रतिशेयर आम्दानी पनि बढेको छ। समीक्षा अवधिमा बैंकको यस्तो आम्दानी ३ रुपैयाँ २४ पैसा बढेर १७ रुपैयाँ ३४ पैसा पुगेको छ। चैत मसान्तसम्ममा बैंकको मूल्य आम्दानी अनुपात १८.८८ गुणा रहेको छ भने प्रतिशेयर नेटवर्थ १३५ रुपैयाँ ४९ पैसा रहेको छ।

गत आर्थिक वर्षको अन्त्यको तुलनामा चालु आर्थिक वर्षको सोही अवधिसम्ममा बैंकको चुक्ता पूँजी १०.८५ प्रतिशत बढेको छ भने जगेडा कोष ३.७३ प्रतिशत बढेको छ। त्यसैगरी, समीक्षा अवधिमा बैंकको निक्षेप ९.५७ प्रतिशत र कर्जा १६.५५ प्रतिशत बढेको छ।