गोर्खा भूकम्पका ६ बर्ष: ‍९३ प्रतिशत निजी आवास निर्माण सम्पन्न

१२ बैशाख, काठमाडौं । गोर्खा भूकम्प गएको ६ बर्ष पुरा भएको छ । गएको ६ बर्षमा अधिकांश संरचनाहरूको पुन:र्निर्माण गरिसकेको राष्ट्रिय पुनर्निर्माण प्राधिकरणले जनाएको छ  । अहिले निजी आवासतर्फ सम्पन्न भएका र पुनर्निर्माण हुँदै गरेका तथ्याङ्क हेर्दा ९३ प्रतिशत निजी आवास निर्माण सम्पन्न भएको छ । यस्तै, विद्यालयतर्फ ७ हजार ५ सय ५३ विद्यालय मध्ये ८३ प्रतिशत बराबरको निर्माण सम्पन्न भएको छ । १७ प्रतिशत विद्यालय पुनर्निर्माण भइरहेका छन् । त्यस्तै, कुल १,१९७ स्वास्थ्य संस्थामध्ये ६९८ को पुनर्निर्माण सम्पन्न भएको छ । भने २९६ को पुनर्निर्माण जारी छ ।

५१ प्रतिशत पुरातात्विक सम्पदाको पुनर्निर्माण भइसकेको छ । अहिले ३२ प्रतिशत सम्पदाको काम भइरहेको छ । राष्ट्रको मुख्य प्रशासनिक भवन, सिंहदरबारको उत्तर, दक्षिण  भागमाकार्यालय संचालन सुरु भएको छ । केशरमहल, बबरमहल, बालमन्दिर, नारायणहिटी संग्राहालय क्षेत्रमा रहेको रणोद्दीप दरबारलगायतका पुरातात्विक महत्वका दरबारहरुको जिर्णोद्धारकोक्रममा छ  ।

क्षति भई मर्मत गर्नुपर्ने ४०२ गुम्बामध्ये २९४ वटा सम्पन्न भइसकेका छन् । पुनर्निर्माण गर्नुपर्ने ८९५ मध्ये १०० वर्षभन्दा पुराना र २,००० वर्ग फिटभन्दा बढी प्लिन्थ एरिया भएका २६४ वटा गुम्बामध्ये ३६ वटा र १०० वर्षभन्दा कम र २,००० वर्ग फिटभन्दा मुनिका ६३१ गुम्बामध्ये १०१ वटाको पुनर्निर्माण कार्य अगाडि बढिरहेको छ ।यसरी हेर्दा पुरातात्विक सम्पदाहरू मध्ये ८१ प्रतिशत सम्पदा निर्माण सम्पन्न हुने चरणमा रहेका छन् ।

यस्तै सरकारी भवनतर्फ राम्रो प्रगति हासिल भएको देखिन्छ । ४१५ सरकारी भवनमध्ये ९१ प्रतिशत सम्पन्न भइसकेको छ भने अरु बाँकी काम निर्माणको प्रक्रियामा छ ।सुरक्षा निकायको भवनतर्फ २१६ वटा निर्माण गर्नुपर्नेमा ९८ प्रतिशतको काम सम्पन्न भइसकेको छ । । चैत मसान्तसम्म ३ खर्ब ५३ अर्ब रुपैयाँ बराबरको खर्च भइसकेको छ ।