पूर्व राजा ज्ञानेन्द्रलाई अक्सिजन सर्पाेट

१२ बैशाख, काठमाडौं । पूर्व राजा ज्ञानेन्द्र शाह र पत्नी कोमल कोरोनाबाट आक्रान्त भएपछि उपचारका लागि थापाथलीस्थित नर्भिक अस्पताल नै भर्ना भए । अस्पताल पुगेको पूर्व राजदम्पतिको स्वास्थ अवस्था एक्कासी कमजोर देखिएपछि अक्सिजन दिएर उपचार गरिएको छ ।

नर्भिक अस्पताल स्रोतले बताए अनुसार, पूर्व राजदम्पतिको स्वास्थ स्थिर रहेको छ । हिजो भने अलि असजिलो भएकाले अक्सिजन नै दिइएको थियो । पूर्व राजदम्पतिका साथै छोरी प्रेरणासमेत कोरोना संक्रमणबाट थलिएकी छन् ।

उनलाई पनि नर्भिक अस्पतालमै लगेर उपचार गरिएको छ । प्रेरणाको स्वास्थ अवस्था सामान्य छ । उनलाई भने अक्सिजन दिनुपरेको छैन । भारतको हरिद्वारमा सम्पन्न कुम्भ मेला स्नान गरी फर्केका पूर्व राजदम्पतिमा गएको साता कोरोना संक्रमण भएको थियो ।