काेराेनाका कारण कांग्रेस बैठक सर्‍यो

१२ बैशाख, काठमाडौं । नेपाली कांग्रेसले केन्द्रीय सदस्यहरूको कोरोना परीक्षण गर्ने भएको छ। सोमबार कोरोना परीक्षण गरेर त्यसको रिपोर्ट आइसकेपछि केन्द्रीय समिति बैठक बस्ने निर्णय आज बसेको पदाधिकारी र पूर्वपदाधिकारी बैठकले गरेको हाे ।

सभापति शेरबहादुर देउवाको निवास बुढानिलकण्ठमा आज पदाधिकारी र पूर्वपदाधिकारी बैठक बसेको थियो। कोरोना संक्रमितको संख्या दिनप्रतिदिन बढेको भन्दै केसीले केन्द्रीय सदस्यहरूको कोरोना परीक्षण गरेर मात्रै १५ वैशाखको बैठकमा सहभागी हुन कोभिड– १९ नभएको विवरण पेस गर्नुपर्ने नेता अर्जुननरसिंह केसी बताए ।

बैठकमा ओली सरकारको विकल्प दिनका लागि कांग्रेसको नेतृत्वमा हुँदै आएको पहल र छलफल सकारात्मक दिशातिर अघि बढेको निष्कर्ष निकालिएको छ । कांग्रेसले नयाँ सरकार गठनका लागि पहल गर्ने निर्णय लिएपछि माओवादीसहितका दलहरूसँग संवाद गर्दै आएको छ ।

सोहीअनुसार पटक पटक माओवादी केन्द्रका अध्यक्ष प्रचण्ड र जसपासँग पनि छलफल भएको छ । कांग्रेसले ओलीविरुद्ध अविश्वास प्रस्ताव ल्याउनका लागि हस्ताक्षरअभियान समेत चलाएको छ । सो अभियानले छिट्टै पूर्णता पाउने नेताहरुले बताउँदै आएका छन् । बैठकमा अन्य पार्टीबाट कांग्रेस प्रवेश गर्नेहरुको उचित व्यवस्थापन गर्ने, विदेशमा रहेका पार्टीको महाधिवेशनका मतदातालाई अब समावेश नगर्नेलगायतका विषयमा पनि छलफल भएको बताइएको छ ।