काठमाडौं उपत्यकामा आगामी बिहीबारदेखि निषेधाज्ञा लगाइने

१३ बैशाख, काठमाडौं । कोरोना भाइरसको संक्रमण तीव्र रुपमा बढेपछि काठमाडौं उपत्यकामा निषेध आदेश लगाउन प्रस्ताव गरिएको छ ।काेराेना संक्रमण नियन्त्रणका लागि काठमाडौं उपत्यकामा आगामी बिहीबारदेखि निषेधाज्ञाकाे तयारी सरकारले गरेकाे हाे ।

अर्को सूचना जारी नभएसम्म वैशाख १६ गते बिहीबारदेखि निषेधाज्ञा जारी हुने भएको छ । पहिलो चरणमा एक हप्ताका लागि निषेधाज्ञा जारी हुने भनिए पनि कम्तीमा एक महिनासम्म निषेधाज्ञा लागू हुने बताइएकाे छ ।

उपत्यकामा बिहीबारदेखि निषेधाज्ञा लागु हुने सुचना केहीबेरमा प्रकाशित हुँदैछ ।  काठमाडौं, भक्तपुर र ललितपुरका प्रमुख जिल्ला अधिकारीहरुको संयुक्त बैठकले यो निर्णय गरेको हो । निषेधाज्ञा अवधिभर अत्यावश्यक बाहेकका सबै सेवा बन्द हुनेछन् ।

देशभर कोरोना संक्रमण बढिरहेका बेला आज साँझ मन्त्रिपरिषद् बैठक पनि बस्दैछ । बैठकले लकडाउन, निषेध आदेश वा अन्य कदमबारे निर्णय गर्ने अपेक्षा गरिएको छ ।

आइतबारसम्मको तथ्यांक अनुसार काठमाडौं उपत्यकाका तीन जिल्लासहित मुलुकका ९ जिल्लामा सक्रिय संक्रमितको संख्या ५०० भन्दा माथि छ । सीसीएमसीले शहरी क्षेत्रका जिल्लामा ५०० र ग्रामीण जिल्लामा २०० भन्दा बढी सक्रिय संक्रमित पुगे लकडाउन गर्न सिफारिस गरेको छ । ५०० भन्दा बढी सक्रिय संक्रमित रहेका जिल्लाहरु काठमाडौं, बाँके, ललितपुर, रुपन्देही, पर्सा, भक्तपुर, कास्की, मोरङ, दाङ हुन् ।