सिद्धार्थ बैंकको मुनाफा २ अर्बभन्दा बढी, प्रतिशेयर आम्दानी पनि बढ्यो

१४ बैशाख, काठमाडौं । सिद्धार्थ बैंक तेस्रो त्रैमासको वित्तीय विवरण सार्वजनिक गरेको छ। विवरण अनुसार बैंकको मुनाफामा उल्लेख्य प्रगती भएको छ ।

तेस्रो त्रैमासम्ममा बैंकले २ अर्ब ६ करोड ५२ लाख रुपैयाँ मुनाफा आर्जन गरेको छ। जुन गत आर्थिक वर्षको सोही अवधिको तुलनामा ५४.१२ प्रतिशत बढी हो।त्यस्तै, समीक्षा अवधिमा बैंकको ब्याज आम्दानी भने ६.०३ प्रतिशत घटेको छ। तर, सो अवधिमा बैंकको कमिशन आम्दानी १९.८२ प्रतिशत र सञ्चालन मुनाफा ५०.७५ प्रतिशत बढेको छ। यस अवधिमा बैंकको वितरण योग्य मुनाफा ८३ करोड १४ लाख रुपैयाँ पुगेको छ।

मुनाफा बढेसँगै बैंकको प्रतिशेयर आम्दानी पनि बढेको छ। समीक्षा अवधिमा बैंकको यस्तो आम्दानी ६ रुपैयाँ ३७ पैसा बढेर २५ रुपैयाँ २८ पैसा पुगेको छ। चैत मसान्तसम्ममा बैंकको मूल्य आम्दानी अनुपात १७.६ गुणा रहेको छ भने प्रतिशेयर नेटवर्थ १८१ रुपैयाँ ८९ पैसा रहेको छ।