जसपा फेरि अनिर्णित !

१४ बैशाख, काठमाडौं । सत्ता गठबन्धनका लागि साँचो बनेको जनता समाजवादी दलका शीर्ष नेताहरु एउटै धारणा बनाउन आज पार्टी कार्यालयमा भेला भएपनि ठोस निर्णय गर्न सकेनन् । नेपाली कांग्रेस र नेकपा माओवादी केन्द्रले प्रधानमन्त्री केपी ओलीविरुद्ध अविश्वास प्रस्ताव दर्ताको तयारी तीब्र बनाएकाले जसपा नेताहरु पनि तातेका हुन् ।

नेपाली कांग्रेस र माओवादी केन्द्रका शीर्ष नेताले तत्काल निर्णय गर्न दबाब दिएपछि आज बसेको जसपा बैठक फेरि पनि अनिर्णित अवस्थामै रह्यो । आज बसेको बैठकमा सहभागी नेताहरुबीच फेरि पनि मत बाझिएको छ । अध्यक्ष महन्थ ठाकुर र राजेन्द्र महतोले ओलीले आफ्ना माग पूरा गर्ने प्रकृया थालिसकेकाले केही समय धैर्य गर्नुपर्ने धारणा राखेका थिए ।

तर उपेन्द्र यादव र डा. बाबुराम भट्टराईले भने प्रतिगमनकारी शक्तिको प्रतीकका रुपमा रहेका ओलीसँग सहकार्य गर्न नसकिने भन्दै नयाँ गठबन्धन बनाएर आफू अनुकुलको निर्णय लिनुपर्ने मत राखे । ठाकुर र महतोले आफ्नो अडान कायमै राखेकाले कुनै निर्णय हुन सकेन । बैठकमा सहभागी नेताहरु अशोक राई र राजेन्द्र श्रेष्ठले भने ओलीको निर्णय पर्खेर बाँकी काम पछि गर्न सल्लाह दिएकाले आजको बैठकले केही ठोस निर्णय गरेन ।

जसपाले आज ठोस धारणा बनाएको थियो भने भोलिका लागि कांग्रेस सभापति शेरबहादुर देउवाले ओली सरकारविरुद्ध अविश्वास प्रस्ताव दर्ता गर्ने तयारी गरेका थिए । जसपाले निर्णय नगरेपनि यही हप्ता भित्र अविश्वास प्रस्ताव दर्ता गर्ने अन्तिम तयारी भएको स्रोतले बतायो । त्यस्तो अवस्था आए जसपाको एउटा पक्षले अविश्वास प्रस्तावमा हस्ताक्षर गर्ने जानकारी देउवालाई दिएका छन् । एमाले कै माधवकुमार नेपाल पक्षले पनि अविश्वास प्रस्ताव आए साथ दिने संकेत दिएकाले देउवा हौसिएका हुन् ।