वालिङमा राजश्व सुधार कार्य योजना सम्बन्धी छलफल

१४ वैशाख, वालिङ । वालिङ नगरपालिकामा आज राजश्व सुधार तथा कार्य योजना तर्जुमासम्बन्धी छलफल एवं अन्तरक्रिया गरिएको छ ।

वालिङ नगरपालिकाको आयोजना तथा गण्डकी प्रदेश प्रशिक्षण प्रतिष्ठान पोखराको सहयोगमा छलफल एवं अन्तरक्रिया गरिएको हो ।

अन्तरक्रिया कार्यक्रममा बोल्नुहुँदै नगर प्रमुख दिलीपप्रताप खाँणले नगरपालिकाले राजश्वसम्बन्धी कार्य योजनाहरु बनाउँदा देखिएका कमी कमजोरी तथा त्रुटिहरुलाई सुधार गर्दै नागरिकमैत्री बनाउँदै लैजाने प्रतिबद्धता जनाए । नगरपालिका करको दर नभई दायरा बढाउने गरी अगाडि बढ्ने बताउदै उनले प्रगतिशील कर प्रणालीमा जोड दिईने धारणा राखे ।

“नागरिकले तिरको करको सही सदुपयोग गर्नुपर्छ भन्नेमा नगरपालिका सदैव सजग र सचेत छ” नगर प्रमुख खाँणले भने, “आफुले तिरको करलाई कुन कुन क्षेत्रमा प्रयोग गरियो भन्ने कुरा नागरिकले जान्न पाउने गरी देखिने गरी पारदर्शिता देखाउन सकेमा अझै प्रभावकारी हुने छ ।”

कार्यक्रममा उपप्रमुख एवं राजश्व परामर्श समिति संयोजक कल्पना तिवारीले वालिङ नगरपालिकामा प्रदेशमै पहिलोपटक यो छलफल तथा अन्तरक्रिया सञ्चालन गर्न पाउनु निक्कै महत्वपूर्ण र उपलब्धीमूलक रहेको बताइन् । उनले कर प्रणालीलाई अझै व्यस्थित र गुणस्तरीय तरिकाले सञ्चालन गर्दै हाल भएका कमी कमजोरीहरुलाई सुधारसहित अगाडि बढ्ने प्रतिबद्धता जनाए ।

कार्यक्रममा प्रमुख प्रशासकीय अधिकृत राजन भट्टराईले करको संभावित क्षेत्र, करका क्षेत्रमा भएका असल अभ्यासहरुकाबारेमा जानकारी लिनका लागि अन्तरक्रियाको आयोजना गरिएको बताए ।

कार्यक्रममा विषय विज्ञकोरुपमा सुरेन्द्र वाग्लेले सहजीकरण गरेका थिए भने नगर प्रमुख खाँणको सभापतित्वमा सम्पन्न कार्यक्रमको सञ्चालन राजश्व शाखा प्रमुख पदमप्रसाद पाण्डेले गरेका थिए ।