सानो पाइलाले दियो नारायणीलाई ६ वटा भेन्टिलेटर

१५ बैशाख, वीरगञ्ज । सानो पाइलाले वीरगञ्जस्थित नारायणी अस्पताललाई ६ वटा भेन्टिलेटर उपलब्ध गराएको छ । सानो पाइलाले नेपाल भेन्टिलेटर सर्भिस ‘गैरनाफामुलक कम्पनी’ सँगको सहकार्यमा नारायणी अस्पतालमा एक महिनाका लागि भेन्टिलेटरहरुको व्यवस्था गरेको हो ।

अस्पतालमा कोरोनाका विरामीहरु बढ्‍दै गएपछि उनीहरुको उपचारमा सहजताका लागि थप भेन्टिलेटरहरु उपलब्ध गराएको सानो पाइलाकी सचिव डा। सुष्मा तिवारीले बताइन् । तिवारीले उक्त भेन्टिलेटरहरु नारायणी अस्पतालका मेडिकल सुपेरिटेन्डेन्ट डा. सञ्जय ठाकुरलाई भेन्टिलेटर हस्तान्तरण गरिन् । यस्तै सानो पाइलाले उपलब्ध गराएको भेन्टिलेटरहरु हाल कोभिडका बिरामीहरुका लागि सबभन्दा उपयोगी हुने अस्पतालका कोभिड संयोजक डा। सरोज रोशन दासले बताए ।

योसँगै नारायणी अस्पतालमा प्रयोगयोग्य भेन्टिलेटरको संख्या १५ पुगेको छ । यसअघि नारायणी अस्पतालमा कुल १० वटा भेन्टिलेटर मात्र रहेको थियो । जसमध्ये ५ वटा कोभिडका बिरामीका लागि छुट्ट्याइएको थियो भने ५ वटा अन्य बिरामीहरुका लागि राखिएको थियो । उक्त भेन्टिलेटरहरु कोभिड आईसीयु र एसडियूमा जडान गरिसकिएको उनको भनाइ छ ।

पहिलो लहरको कोरोना भाइरस करिब नियन्त्रणमा आइसकेपछि विस्तारै सामान्य बनेको हाम्रो दिनचर्र्या दोस्रो लहरको संक्रमणसँगै फेरि असामान्य हुँदै गएको छ । पछिल्ला दिनहरूमा कोरोना भाइरस संक्रमणको प्रकृति र रफ्तार हेर्दा अवस्था थप चिन्ताजनक बन्न पुगेको देखिन्छ । संक्रमितहरुको संख्या दिनानुदिन उकालो लागिरहेको छ । मंगलबार मात्रै पर्सामा ६४ जनामा संक्रमण पुष्टि भएको छ भने पछिल्लो २४ घण्टामा ५ जना संक्रमितको मृत्यु भएको छ ।