रेशमको मुद्धा फिर्ता लिन मिल्दैनः बडाल

१५ बैशाख, काठमाडौं । जनता समाजवादी दलको मुख्य मागका रुपमा रहेको कैलाली हत्याकाण्डका मुख्य अभियुक्त रेशमलाल चौधरीलाई रिहा गर्न तयार वर्तमान सरकारकै मुख्य कानूनी सल्लाहकारले नकारेका छन् । प्रधानमन्त्री केपी ओलीका सरकारी कानूनी सल्लाहकारका रुपमा रहेका महान्याधिवक्ता रमेश बडालले आज चौधरीको रिहाई असम्भव रहेको प्रष्ट्याएका छन् ।

आजै आफ्नै कार्यकक्षमा पत्रकारहरुसँग कुरा गर्दै महान्याधिवक्ता बडालले भने–चौधरीको मुद्धा फिर्ता लिन सकिन्न । मौजुदा कानून र संविधानले चौधरीको मुद्धा फिर्ता लिन सक्ने अवस्था छैन – उनले भने । चौधरीले दिएको पुनरावेदन अहिले सर्वाेच्च अदालतमा विचाराधीन अवस्था रहेकाले सरकारले फिर्ता लिन सक्दैन भन्दै महान्याधिवक्ता बडालले जिल्ला अदालतबाट भएका फैसलाको मात्र मुद्धा फिर्ता लिन सकिने प्रष्ट पारे ।

तर ओली सरकारका लागि सञ्जीवनी बुटीका रुपमा रहेको चौधरीको रिहाई गर्न नमिल्ने भएपछि जसपा भित्रको विवादले नयाँ रुप लिन सक्ने बताइएको छ । ओली सरकारविरुद्ध अविश्वास प्रस्ताव ल्याउन तीब्र दवाव परिरहेका बेला महान्याधिवक्ताको यस्तो भनाई आएको हो ।