जनमोर्चाका सांसद गायब ?

१५ बैशाख, पोखरा । गण्डकी प्रदेश सरकारविरुद्ध आज हुने मतदानमा निर्णायक मत रहेको राष्ट्रिय जनमोर्चा नेपालका एक सांसद अनुपस्थित भएका छन् । मतदानको अन्तिम तयारी भइरहेका बेला जनमोर्चाका सांसद खिमविक्रम शाही सम्पर्कविहीन भएका हुन् ।

मुख्यमन्त्री पृथ्वीसुब्बा गुरुङविरुद्ध नेपाली कांग्रेस, नेकपा माओवादी र जनता समाजवादी दलले अविश्वास प्रस्ताव दर्ता गरेपनि आवश्यक बहुमत छैन । ६० सदस्यीय प्रदेशसभामा यी तीन दलको मात्र २८ मत रहेको छ ।

मुख्यमन्त्रीविरुद्धको अविश्वास प्रस्ताव पास हुन कम्तिमा ३१ मत आवश्यक पर्छ । अपुग मत राष्ट्रिय जनमोर्चा नेपालका तीन सदस्यबाट पूर्ति हुने अवस्था छ । जनमोर्चाले एमाले नेतृत्वको सरकारविरुद्ध मत दिने निर्णय गरिसकेको छ । त्यसैले शाहीको मत निर्णायक अवस्थामा रहेको छ ।

मतदानको तयारी चलिरहेका बेला अनुपस्थित सांसद शाहीलाई तारन्तार फोन गर्दा स्वीच अफ भएको अवस्था रहेको छ । त्यसैले अब मतदान भयो भने सरकार नढल्ने परिस्थिति निर्माण भएको छ ।

अर्का एक सांसद राजीव गुरुङ ( दीपक मनाङे ) ले पनि अविश्वासको पक्षमा मत दिने बताएका थिए । तर उनी पनि अहिले सभामा उपस्थित छैनन् । यसमा सत्ता पक्षको गडबडी रहेको विपक्षीहरुको धारणा छ । आजै मतदान गर्ने हो भने अनुपस्थित सांसद्लाई खोज्नै पर्ने बाध्यता रहेको छ ।