संक्रमितलाई कुनै सहयोग चाहिए ९८५१२५५८३९ मा फोन गर्नुस

१५ बैशाख, काठमाडाैं । नेपालमा कोरोना भाइरसको सक्रिय संक्रमितको सङ्ख्या ३० हजार नाघेको छ । पछिल्लो २४ घण्टामा चार हजार आठ सय ९७ जनामा कोरोना संक्रमण पुष्टि भएसँगै सक्रिय संक्रमितको सङ्ख्या ३० हजार नौ सय दुई पुगेको हाे ।

स्वास्थ्य तथा जनसङ्ख्या मन्त्रालयका अनुसार पछिल्लो २४ घण्टामा १३ हजार आठ सय ७९ जनाको पीसीआर परीक्षण गर्दा चार हजार सात सय ७४ र नौ सय ५५ जनाको एन्टिजेन परीक्षण गर्दा एक सय २३ जनामा कोरोना संक्रमणकाे पुष्टि भएको छ ।

आज संक्रमाण पुष्टि भएकामध्ये दुई हजार ४७ जना काठमाडौं उपत्यकाका रहेका छन् । आज काठमाडौंमा एक हजार चार सय ६४, भक्तपुरमा दुई सय ३२ र ललितपुरमा तीन सय ५१ जनामा कोरोना सङ्क्रमण देखिएको हो । योसँगै नेपालमा कुल संक्रमितको सङ्ख्या तीन लाख १२ हजार ६ सय ९९ पुगेको छ ।

पछिल्लो २४ घण्टामा सात सय ७३ जना कोरोना संक्रमित निको भएसँगै संक्रमणमुक्त हुनेको सङ्ख्या दुई लाख ७९ हजार दुई सय ७९ पुगेको स्वास्थ्य मन्त्रालयले जनाएको छ । यस्तै पछिल्लो २४ घण्टामा १० जनासहित थप १७ जनाको संक्रमणबाट ज्यान गएको छ । नेपालमा अहिलेसम्म कोरोना संक्रमणबाट तीन हजार दुई सय ११ जनाले ज्यान गुमाएका छन् ।

यसैबीच, कोरोनाले सिकिस्त भए कुन अस्पताल जाने  ? कोरोना संक्रमण भएपछि होम-आइसोलेसन बस्ने ठाउँ भएन, वा होम आइसोलेसनमा बसिरहेको व्यक्तिलाई समस्या बढ्दै गयो भने के गर्ने ?

काठमाडौंमा त झन् आइसोलेसन कहाँ छ, कुन अस्पतालमा बेड खाली छ वा भेन्टिलेटर भएको ठाउँ कहाँ खाली छ भन्ने कुराको जानकारी नहुँदा संक्रमित र उनीहरूका परिवार हतास हुनु स्वभाविक हो।

स्वास्थ्य मन्त्रालयले भने कोरोना संक्रमितलाई कुनै पनि सहयोग चाहियो भने आफूलाई फोन गर्न भनेको छ। स्वास्थ्य मन्त्रालयले आफ्नो सूचना शाखाका २ हटलाइन नम्बर ११३३, १११५ वा मोबाइल नम्बर ९८५१२५५८३९ मा फोन गर्न भनेको छ। फोन गर्न आफूलाई चाहिएको जुनसुकै बेला पनि गर्न सकिन्छ।