बेपत्ता सांसदबारे छानविन गर्न समिति गठन

१६ बैशाख, पोखरा । हिजो एकाएक बेपत्ता बनेका राष्ट्रिय जनमोर्चाका गण्डकी प्रदेशसभा सदस्य खिमविक्रम शाहीको बारेमा यथार्थ बुझ्न पार्टीले छानविन समिति गठन गरेको छ । दिउँसो २ बजेसम्म सम्पर्कमा रहेका सांसद शाही एकाएक वेपत्ता र पछि अस्पताल भर्ना भएको पाइएको घटना शंकास्पद भएको भन्दै पार्टीले समिति गठन गरेको हो ।

पार्टी महासचिव मनोज भट्टको संयोजकत्वमा गठन भएको समितिले एक साता भित्रै रिपोर्ट बुझाउने छ । हिजो नै प्रदेश सरकारविरुद्ध अविश्वास प्रस्तावमाथि मतदानको तयारी चलिरहेका बेला सांसद शाही  एकाएक बेपत्ता भएका थिए ।

दिउँसो २ बजेसम्म पार्टी संयन्त्रसँग सम्पर्कमा रहेका शाही पछि कोरोना संक्रमण भएको भन्दै चरक अस्पतालको स्वीट रुममा फेला परेका थिए । एउटै दिन उनको दुई ठाउँमा गरिएको परीक्षणमा फरक फरक रिपोर्ट आएको थियो ।