४३ दिनमा तीन हजार नाध्यो महिला लघुवित्तको शेयरमूल्य, आज पनि सर्किट लेवलमा कारोबार

१६ बैशाख, काठमाडौं । ४३ दिन अघि मात्रै नेप्सेमा सूचीकृत भएको महिला लघुवित्तको शेयरमूल्य बिहिबार तीन हजार रुपैयाँ नाघेको छ।
गत वर्ष चैत्र ३ गते मंगलबार नेप्सेमा सूचीकृत भएको लघुवित्तको शेयर दोस्रो बजारमा चैत ४ गते बुधबारदेखि कारोबारमा आएको थियो।

कम्पनीको पहिलो कारोबार ४३८ रुपैयाँमा भएको थियो। त्यसपछिको डेढ महिना सम्म ३० करोबार दिनमा हरेक दिन १० प्रतिशतले मूल्य बढ्दै बैशाख १६ गते प्रति कित्ता ३१२५ रुपैयाँमा किनबेच भएको हो।

बिहीबार पनि कम्पनीको शेयर मूल्य १० प्रतिशतले बढेर ३१ सय २५ रुपैयाँ पुगेपछि लगातार ३० कारोबार दिनसम्म मूल्य बढ्ने दोस्रो कम्पनी बनेको छ। यस अघि चन्द्रागिरी हिल्सको शेयर मूल्य लगातार ३३ कारोबार दिन सम्म बढेको रेकर्ड छ।

बिहीबार पनि कम्पनीको शेयर माग करिब दुई लाख कित्ता भन्दा बढी रहेको छ।