लुम्विनी प्रदेश सांसद पदमुक्त घटनापछि जसपा पार्टी विभाजनको सन्निकट !

१७ बैशाख, काठमाडौं । लुम्विनी प्रदेशका मुख्यमन्त्री शंकर पोखरेल विरुद्धको  अविश्वासको प्रस्तावमा हस्ताक्षर गरेर पछि  पोख्रेलकै मन्त्रीमण्डलमा सहभागि बनेका जनता समाजबादी दलका ४ सांसदलाई कारवाही गरिएसँगै जसपा फुटको संघारमा पुगेको छ भने पार्टी भित्र समानान्तर गतिविधि शुरु भएका छन् ।

जसपाको बाबुराम भट्टराई–उपेन्द्र यादव पक्षको पत्र अनुसार बिहीबार प्रदेश सचिवालयले सूचना जारी गरी सन्तोषकुमार पाण्डेय, विजयबहादुर यादव, समुन शर्मा र कल्पना पाण्डेको प्रदेशसभा सदस्य पद खारेज भएको छ। तर यता राजेन्द्र महतो र महन्थ ठाकुर पक्षले भने जसपाको महन्थ ठाकुर पक्षले लुम्बिनी प्रदेशका सभामुखलाई सम्बोधन गरेर अर्को पत्र पठाउदै उनिहरुको पद कायमै रहेको र त्यो निर्णय पार्टीले नगरेको जानकारी गराएको छ ।

नेता ठाकुर र महतोले पार्टीको कुनै पनि कमिटीले चार सांसदलाई कारवाही नगरेको भन्दै सभामुखले फर्जी सिफारिसलाई आधार मानेर कारवाही गरेकाले त्यसले मान्यता नपाउने वताएका छन् । पार्टीमा यसबारेमा कुनै छलफल भएको छैन । “कार्यकारिणी समितिको बैठक नै बसेको छैन । यस्तो गलत र फर्जी काम कसरी भयो ? प्रदेश सभाका बहुमत सांसदलाई कसले कार्वाहि गर्न सक्छ ? यो निर्णय कार्यन्वयनमा आउन सक्दैन”। नेता महतोले भने ।

यसअघि केपी ओलीलाई सहयोग गर्ने पक्षमा ठाकुर र महतो र नयाँ सरकार बनाउने पक्षमा उपेन्द्र यादव र बावुराम भट्टराई देखिदै आएपनि  एकपक्षले कारवाहीको पत्र काटने अर्को पक्षले त्यसलाई स्वीकार नगर्ने अवस्था आएसँगै जसपा फुटउन्मुख भएको छ ।  सत्ता समीकरणको निर्णायक मानिएको जसपाका माग प्रधानमन्त्री ओलीले संवोधन गर्दै गएकाले पनि जसपा ओलीलाई साथ दिने मनस्थितिमा पुगेको छ  ।  तर त्यो अवस्था आउनु पूर्व नै लुम्विनी प्रदेशको घटनाले जसपा विभाजित हुने अवस्थामा पुगेको विश्लेषण गरिएको छ।