निषेधाज्ञाको अवधिभरमा अनलाइन सेवामा जोड दिन बीमा समितिको निर्देशन

१७ बैशाख, काठमाडौं । बीमा समितिले जीवन तथा निर्जीवन बीमा कम्पनीहरुलाई निषेधाज्ञा अवधि भर अनलाइन मार्फत बीमालेख जारी गर्न निर्देशन दिएको छ । समितिले एक सर्कुलर जारी गर्दै इजाजत प्राप्त सबै बीमा कम्पनीहरुलाई उक्त निर्देशन दिएको हो ।

तर बीमालेख अनलाईनबाट जारी गर्दा अनिवार्य रुपमा बीमा समितिबाट जारी भएका ऐन नियम र निर्देशिकाका साथै बीमकको अन्डराइटिङ्ग म्यनलुममा अधिनमा रहनु पर्दछ ।

बीमालेखको प्रस्ताव फारम अनलाइन मार्फत भराउने र पर्याप्त रुपमा बीमा जोखिमाङ्कन गरी बीमालेख जारी गर्न सकिने समितिले जनाएको छ । बीमालेख प्रस्तावको फारम भर्दा ग्राहक पहिचान फारम, फोटो लगायत अन्य जानकारी समेत मिलाउनु पर्ने समितिले जारी गरेको सर्कुलरमा उल्लेख छ । अनलाईनबाट नवीकरण गर्न सकिने व्यवस्था मिलाउन पनि निर्देशन दिएको छ ।

यस्तै बीमालेख अन्तर्गतको बीमाशुल्क विभिन्न बैंक तथा वित्तीय संस्थाहरुको मोवइल बैंकिङ्ग, इबैकिङ्ग तथा अनलाईन सेवा प्रदायक मार्फत समेत भुक्तानी गर्न सकिने व्यवस्था मिलाउन निर्देशन दिएको छ ।

निर्जीवन बीमा कम्पनीले तत्काल सृजना हुने दाबी भुक्तानीको लागि विद्युतीय माध्यमबाट समेत निवेदन प्राप्त भएमा निषेधाज्ञाको अवधि सामाप्त भएपछि तत्काल सर्भेयर खटाएर क्षतिको यकिन गरी दाबी भुक्तानी गर्ने निर्देशन दिएको छ ।

यसैगरी बीमकहरुले आवश्यक बीमा सेवा प्रवाह गर्नुपर्ने कार्यका लागि आवश्यक पर्ने कर्मचारीहरुमध्ये एक तिहाई कर्मचारीहरुबाट आलो पालोमा सेवा सञ्चालन गर्न निर्देशन दिएको छ ।