सर्वोच्च पुगे पुर्पक्षका लागि थुनामा रहेका दीप बस्न्यात

१७ बैशाख, काठमाडौं । अख्तियार दुरुपयोग अनुसन्धान आयोगका पूर्व प्रमुख आयुक्त दीप बस्न्यातले थुनामुक्त गरिपाऊँ भन्दै सर्वोच्च अदालतमा निवेदन दिएका छन्। उनले बन्दी प्रत्यक्षीकरणको रिट निवेदनबाट आफूलाई थुनामुक्त गरिपाऊँ भनेर निवेदन दिएका हुन्।

देशभर कोरोना भाइरसको संक्रमण बढेसँगै काठमाडौं उपत्यकालगायत देशका विभिन्न जिल्लामा हाल निषेधाज्ञा गरिएको छ। यससँगै सर्वोच्चले अहिलेको विषम परिस्थितिमा बन्दी प्रत्यक्षीकरण र जनताको जीवनसँग जोडिएको कोरोना महामारीसँग सम्बन्धी मुद्दाको मात्रै सुनुवाई गर्ने निर्णय गरेको थियो। उनी बन्दी प्रत्यक्षीकरणको रिट लिएर सर्वोच्च पुगेका हुन्। ललिता निवास जग्गा प्रकरणमा विशेष अदालतको आदेशमा पुर्पक्षका लागि थुनामा रहेका छन् ।

ललिता निवास प्रकरणमा मुछिएका बस्न्यातलाई विषेश अदालतले गत वर्ष मंसिरमा थुना पठाउन आदेश दिएको थियो। बस्न्यात सहित १७५ जनाविरुद्ध बालुवाटारको सरकारी जग्गा हिनामिना गरेको अभियोगमा विशेष अदालतमा मुद्दा दायर गरेको थियो। उनले भौतिक पूर्वाधार मन्त्रालयको सचिव हुँदा सरकारी जग्गा हडप्न भूमिका खेलेको आयोगको दाबी छ।

बस्न्यातले आफ्नो मुटुको शल्यक्रिया नगरे जीवन नै जोखिममा पर्ने अवस्था समेत रहेको भन्दै मानवीय दृष्टिले समेत बन्दी प्रत्यक्षीकरणको आदेश जारी गर्नुपर्ने उल्लेख गरेका छन् ।