श्रमिकको न्यूनतम् तलब बढाएर १५ हजार पुर्याउँछौ: प्रधानमन्त्री

१८ बैशाख, काठमाडौं । प्रधानमन्त्री केपी शर्मा ओलीले आगामी आर्थिक वर्ष २०७८/७९ बाट लागू हुनेगरी श्रमिकको न्यूनतम पारिश्रमिक बृद्धि गर्ने बताएका छन् । अन्तर्राष्ट्रिय श्रमिक दिवसका अवसरमा शुभकामना सन्देश दिदै प्रधानमन्त्री ओलीले आउँदो आर्थिक बर्षबाट श्रमिकको न्यूनतम् तलब १५ हजार बढी पुर्याइने बताएका हुन ।

श्रमिकको मासिक तलब १३ हजार ४५० बाट बढाएर १५ हजार पु-याइने त्यसैगरी दैनिक पारिश्रमिक ५१७ रुपैयाँबाट ५७७ रुपैयाँ र प्रतिघण्टा पारिश्रमिक ६९ रुपैयाँबाट ७७ रुपैयाँ बनाइने विषय प्रधानमन्त्रीको शुभाकामना सन्देशमा उल्लेख गरेका छन् ।

एक आर्थिक वर्षमा दुई लाखभन्दा बढीलाई न्यूनतम सय दिनको काम वा न्यूनतम ज्यालाको आधा ‘बेरोजगार भत्ता’ उपलब्ध गराएको बताउँदै उनले वैदेशिक रोजगारीमा रहेकाहरूको अधिकार, मर्यादा र सुरक्षाका लागि गन्तव्य मुलुकसँग श्रम सम्झौता गरिएको समेत प्रधानमन्त्री ओलीले उल्लेख गरेका छन् ।

स्वदेशमा कार्यरत श्रमिकहरूको बैङ्कमार्फत तलब भुक्तानी गर्ने प्रणाली सुरु गरिएको र योगदानमा आधारित सामाजिक सुरक्षा योजनामा करिब १२ हजार रोजगारदाता र दुई लाख श्रमिकहरू आबद्ध भइसकेको उनकाे सन्देशमा उल्लेख छ । नेपाली सेनामा १६ वर्षे सेवापछि निवृत्तिभरणको व्यवस्था लागू गरिएको बताउँदै उनले श्रमिकको न्यूनतम पारिश्रमिकमा ३९ प्रतिशत र राष्ट्रसेवक कर्मचारीको पारिश्रमिकमा २० प्रतिशतले वृद्धि गरिएको स्मरण पनि प्रधानमन्त्रीले गराएका छन् ।