चेन्नईमाथि मुम्बईको रोमाञ्चक जित, पोलार्डले कायम गरे नयाँ रेकर्ड

१९ बैशाख, काठमाडौं । भारतमा जारी १४औँ सिजनको आईपीएलअन्तर्गत २७औँ म्याचमा चेन्नई सुपर किंग्समाथि मुम्बई इण्डियन्स ४ विकेटले विजयी भएको छ।

चेन्नईले दिएको दुई सय १९ रनको लक्ष्य मुम्बईले २० ओभरमा ६ विकेट गुमाएर पूरा गर्यो।

उक्त खेलमा किरण पोलार्डले आक्रामक ब्याटिङ गरे। उनले ३४ बलमा ८ छक्का र ६ चौकासहित अविजित ८७ रन बनाए। १४औँ सिजनको आईपीएलमा पोलार्डले १७ बलमा अर्धसतक पुरा गरेका छन् । उनले हालसम्म कम बलमा अर्धसतक पूरा गरेका हुन् ।

यस्तै, क्विन्टन डिककले ३८, कप्तान रोहित शर्माले ३५, क्रृणाल पाण्ड्याले ३२ र हार्दिक पाण्ड्याले १६ रनको योगदान दिए।

बलिङमा साम करनले ३ तथा शार्दुल ठाकुर, रवीन्द्र जडेजा र मोइन अलीले एक–एक विकेट लिए।

त्यसअघि टस हारेर पहिला ब्याटिङ गरेको चेन्नईले निर्धारित २० ओभरमा ४ विकेट गुमाएर दुई सय १८ रन बनाएको थियो।

उसका लागि मोइन अली, फाफ डुप्लेसिस र अम्बाती रायुडूले अर्धशतकीय पारी खेले। रायुडूले २७ बलमा ७ छक्का र ४ चौकासहित अविजित ७२ रन बनाए।

यस्तै, अलीले ३६ बलमा ५ चौका र ५ छक्काको मद्दतमा ५८, डुप्लेसिसले ५०, रवीन्द्र जडेजाले नटआउट २२ रनको योगदान दिए।

बलिङमा किरण पोलार्डले २, जसप्रीत बुमराह र ट्रेन्ट बोल्टले १–१ विकेट लिए।

यस जितसँग मुम्बई चौथो स्थानमा कायमै छ। मुम्बईले ७ खेलमा चार मा जित र ३ खेलमा हार व्यहोरेको छ।

चेन्नईले ७ म्याचमा पाँचमा जित र दुईमा हारको सामना गरेको छ। चेन्नई पनि अंकतालिकाको शीर्ष स्थानमा यथावत् नै रहेको छ।