निर्माणाधीन गौतमबुद्ध रङ्गशालालाई आर्थिक सहयोग

१९ बैशाख, चितवन । चितवन समाज आयरल्याण्डले चितवनको रामपुरमा निर्माणाधीन गौतमबुद्ध अन्तर्राष्ट्रिय क्रिकेट रङ्गशालालाई आर्थिक सहयोग गरेको छ ।

शनिबार रङ्गशाला परिसरमा आयोजित एक कार्यक्रमका बीच समाजका महासचिव विवेकराज सपकोटाले धुर्मुस–सुन्तली फाउण्डेशनका अध्यक्ष सीताराम कट्टेल धुर्मुसलाई रु तीन लाखको चेक हस्तान्तरण गरे ।

सो अवसरमा अध्यक्ष धुर्मुसले कठिन परिस्थितिमा पनि विदेशी भूमिमा रहेर बगाएको रगत पसिनाको कमाइ सङ्कलन गरी सहयोग उपलब्ध गराएको भन्दै दाता संस्था चितवन समाज आयरल्याण्डका अध्यक्ष चेतराज ओली र सम्पूर्ण आयरल्याण्डवासी सहयोगी नेपालीहरुप्रति आभार व्यक्त गरे ।

समाजका महासचिव सापकोटाले जनस्तरबाट निर्माणाधीन रङ्गशालालाई सम्पन्न गराउन सरकारदेखि गैरआवासीय नेपालीसम्मलाई सहयोगको निम्ति आह्वान गरे ।