विपक्षी दलहरु सक्रिय

२० बैशाख, काठमाडौं । राष्ट्रपति विद्यादेवी भण्डारीले हिजो साँझ अप्रत्यासित रुपमा यही बैशाख २७ गतेका लागि प्रतिनिधिसभा बैठक आह्वान गरेपछि मुलुकी राजनीति अर्को दिशातिर फर्किएको छ ।

सत्ता टिकाउने प्रधानमन्त्री केपी ओलीको नयाँ फण्डाका रुपमा यो अधिवेशन डाकिएको धेरैको अनुमान छ । किनभने उनले वैशाख २७ गते प्रतिनिधिसभाबाट विश्वासको मत लिन चाहेको बुझिन्छ । जबकी प्राविधिक रुपमा अझै ओली वहुमतमै छन् । किनभने नेकपा माओवादी केन्द्रले सरकारलाई दिइरहेको विश्वास औपचारिक रुपमा फिर्ता लिएको छैन ।

यही अवस्थाले गर्दा फेरि विपक्षीहरु चल्बलाएका छन् । प्रमुख प्रतिपक्षी दल नेपाली कांग्रेस ओलीको विकल्प दिन अग्रसर भएपनि आवश्यक मत जुटाउन नसक्दा रमिते बनेको हो । तर एकाएक प्रधानमन्त्री ओलीले विश्वासको मत लिने हेतुले वैशाख २७ गते अधिवेशन डाकेपछि भने कांग्रेस फेरि जुर्मुराएको छ । आज दिउँसो २ बजे सभापति शेरबहादुर देउवाले आफ्नै निवासमा पदाधिकारी बैठक डाकेका छन् ।

बैठकमा समग्र राजनीतिक परिवेशबारे छलफल गर्न लागिएको हो । त्यसैगरी नेकपा माओवादी केन्द्रले पनि स्थायी कमिटी बैठक डाकेको छ । बैठकमा यिनै सन्दर्भबारे छलफल हुने बुझिएको छ । उता, जनता समाजवादी पार्टीले पनि गुटगत रुपमै बैठक र छलफल गरिरहेको छ । अध्यक्ष महन्थ ठाकुरले आफू पक्षीय नेताहरुलाई राजधानी नछाड्न निर्देशन दिएका छन् भने उपेन्द्र यादवले पनि निकट नेताहरुसँग छलफल गरिरहेका छन् ।