लुम्बिनीमा हर्स ट्रेडिङ

२० बैशाख, बुटवल । लुम्बिनी प्रदेशसभामा सत्ता कब्जा गर्न एमालेको केपी ओली समूहले जस्तो सुकै हर्कत गर्छ भन्ने पुष्टी गर्न आज अर्काे नौटंकी रचेको छ । हिजो मात्र मुख्यमन्त्री शंकर पोखरेलको विरोधमा सहीछाप गरेका दुई जना स्वतन्त्र सांसद्हरुलाई धम्क्याए वा फकाएर आज फेरि समर्थनमा ल्याइएको छ ।

सूर्य चिह्न लिएर विजयी भएपनि स्वतन्त्र हैसियतका सांसद्हरु धर्मलाल बहादुर श्रीवास्तव र अजय शाहीले आज छुट्टै वक्तव्य निकालेर पोखरेललाई समर्थन जनाएका छन् । हिजो भने दुबै जनाले पोखरेलप्रति आफूहरुको समर्थन नरहेको भन्दै विपक्षी गठबन्धनमा सही छाप गरेका थिए । आज अचानक उनीहरुको बोली फेरिएको छ ।

यसका पछाडि सत्ताको चाबीले काम गरेको सबैले बुझेका छन् । संघमा हृदयेश त्रिपाठी र वृजेशकुमार गुप्ता निकट उनीहरु आफ्नो विश्वासमा २४ घण्टापनि टिक्न पाएनन् । ओलीले हर्ष ट्रेडिङ ( घोडा व्यापार ) गरेको सबैले बुझेका छन् । सत्ताका लागि ओली पक्षले जस्तो सुकै तिकडम अपनाउँछ भन्ने यही घटनाले पनि पुष्टी गरेको छ ।