थप तीन सांसदसँग स्पष्टीकरण

२० बैशाख, काठमाडौं । प्रधानमन्त्री केपी ओलीले वैशाख २७ गते प्रतिनिधिसभामा विश्वासको मत लिने निधो गरेपछि संभावित फ्लोर क्रस चेक गर्न थप तीनजना सांसद्सँग स्पष्टीकरण लिएका छन् ।

यसरी स्पष्टीकरण सोधिनेमा गंगा चौधरी, कलिला खातुन र समिना हुसेन रहेका छन् । उनीहरु तीनै जना वरिष्ठ नेता माधवकुमार नेपाल पक्षका हुन् । प्रधानमन्त्री तथा संसदीय दलका नेता ओलीका तर्फबाट पार्टीका कार्यालय सचिव शेरबहादुर तामाङले उनीहरुसँग स्पष्टीकरण सोधेका हुन् । उनले म्यासेन्जरमार्फत स्पष्टीकरण सोधेका छन् ।

स्पष्टीकरण सोधिएका तीनै जनाले सोही माध्यममार्फत जवाफ दिएको जानकारी तामाङले दिएका छन् । उनले भने–जवाफ सकारात्मक आएको छ, यसबारे मैले प्रधानमन्त्रीलाई जानकारी दिइसकेको छु ।