जातिराभ स्मृति प्रतिष्ठानद्वारा एकल महिलालाई सहयोग

२० वैशाख,काठमाडौं । कर्मयोगी दम्पति जलपादेवी भट्टराई र तिलकराम भट्टराईका सन्ततिहरुद्वारा उनीहरुको स्मृतिमा स्थापित ‘जातिराभ स्मृति प्रतिष्ठान’ले असहाय, निसन्तान एकल महिला जानुकादेवी भट्टराईलाई रु एक लाख नगदबाट सम्मान गरेको छ ।

अर्घाखाँचीको छत्रदेव गाउँपालिकाका–३ बल्कोट जोरापोखारमा आयोजित कार्यक्रममा गाउँपालिकाका अध्यक्ष लेखनाथ पोखरेलले भट्टराईलाई दोसल्ला ओढाई रु एक लाख नगदबाट सम्मान गरेको प्रतिष्ठानका सदस्य एवं पूर्वराजदूत दिनेश भट्टराईले जानकारी दिए । कार्यक्रममा अध्यक्ष पोखरेलले यस प्रकारको अक्षयकोष स्थापना गरी मानवसेवाको कार्यले समाजमा नयाँ सन्देश प्रवाह गर्ने बताएका थिए ।

प्रतिष्ठानले हरेकवर्ष असहाय, निसन्तान, एकल ज्येष्ठ नागरिक, आर्थिक अभाव भएका छात्रछात्रामध्येबाट गाउँ पालिकाको सम्मतिमा कुनै एक जनालाई सम्मान प्रदान गर्न रु दश लाखको अक्षयकोषको स्थापना गरेको छ । कार्यक्रममा गाउँ पालिकाका उपाध्यक्ष तुलसादेवी श्रेष्ठले, वडाध्यक्षद्वय राजेश पन्थी र अशोक श्रेष्ठ, स्थानीय समाजसेवी चक्रपाणी खनाल, गाउँपालिकाका सचिव अच्युत भट्टराईलगायतले प्रतिष्ठानको सहयोगको प्रशंसा गर्दै यस्ता कार्यले समाजमा प्रेरणा मिल्ने बताएका थिए ।

कार्यक्रममा प्रतिष्ठानका सभापति एवं जलपा–तिलकरामका जेठा छोरा नारायण भट्टराईले सङ्कलित अक्षयकोश तथा प्रतिष्ठानको उद्देश्य, कार्यक्षेत्र र नियमनबारे प्रकाश पारेका थिए ।