माओवादी भागमा परेका नियुक्ति खाली गराउँदै ओली, राजदुत समेत फिर्ता बोलाउन सुरु  

२१ बैशाख, काठमाडौं । नेकपा एमाले र माओवादी केन्द्रको एकिकरणपछि माओवादी कोटाबाट सार्वजनिक नियुक्ति पाएका पदहरु सरकारले खाली गराउँदै  गएको छ ।

यसै क्रममा हिजो मात्र सरकारले सुदुरपश्चिम र गण्डकी प्रदेशमा माओवादी केन्द्रको कोटाबाट प्रदेश प्रमुख भएकालाई हटाई नयाँ प्रदेश प्रमुखलाई नियुक्ति दिएको छ । मन्त्रिपरिषदको सिफारिशमा गण्डकी प्रदेशमा सीता पौडेल र सुदूरपश्चिममा गंगाप्रसाद यादव नियुक्त भएका हुन ।

यसै गरी सरकारले अन्य सरकारी नियुक्तिका साथै राजदुतहरु समेत फिर्ता बोलाउन सुरु गरेको छ । यसैक्रममा अस्ट्रेलियाका लागि नेपाली राजदूत महेश दाहाललाई फिर्ता बोलाउने निर्णय गएको छ।

सरकारले २०७६ को अशोजमा उनलाई अस्ट्रेलियाका लागि राजदूत नियुक्त गरेको थियो । दाहाल नेकपा माओवादी केन्द्रका अध्यक्ष पुष्पकमल दाहाल प्रचण्डको कोटामा राजदूत बनेका हुन् । त्यस अघि दाहाल नेपाल टेलिभिजनका कार्यकारी अध्यक्ष रहेका थिए ।