ज्यानमारा भाइरसले एकै दिन लियो ५५ जनाको ज्यान

२१ बैशाख, काठमाडौं । नेपालमा एकैदिन ज्यानमारा भाइरसले ५५ जनाको ज्यान लिएकाे छ ।  स्वास्थ्य मन्त्रालयका अनुसार पछिल्लाे  २४ घण्टामा कोरोना संक्रमणबाट ५५ जनाको मृत्यु भएको हाे । यो सँगै नेपालमा कोरोनाबाट मृत्यु हुनेको संख्या ३ हजार ४ सय १७ पुगेको मन्त्रालयले जनाएको छ ।

मंगलबार ७ हजार ५ सय ८७ जनामा कोरोना पुष्टि भएको छ । स्वास्थ्य तथा जनसंख्या मन्त्रालयका अनुसार देशभरका प्रयोगशालामा गरिएको १६ हजार १ सय ३१ पीसीआर परीक्षणबाट ७ हजार ५ सय ८७ जनामा कोरोना संक्रमण देखिएको हो ।

वैशाख यता कोरोना भाइरस संक्रमणबाट मृत्यु हुनेको संख्या निरन्तर उकालो लागेको हाे । आइतबार २७ र सोमबार ३७ जनाको मृत्यु भएको थियो । मन्त्रालयको तथ्यांक अनुसार हालसम्म नेपालमा कोरोना संक्रमणबाट मृत्यु हुनेको संख्या ३४१७ पुगेको छ । उनीहरुमध्ये ३५९ जनाको वैशाख महिनाको २१ दिनमा मृत्यु भएको हो ।

कोरोना संक्रमण बढेपछि अहिले काठमाडौं उपत्यकाका साथै थुप्रै जिल्लाहरुमा निषेधाज्ञा जारी गरिएको छ ।