युनियन लाइफ इन्स्योरेन्सको मुनाफा घट्यो

२२ बैशाख, काठमाडौं । युनियन लाइफ इन्स्योरेन्सले चालु आर्थिक वर्षको तेस्रो त्रैमाससम्ममा ८ करोड २५ लाख रुपैयाँ मुनाफा गरेको छ । यो मुनाफा गत वर्षको तुलनामा ७.५६ प्रतिशतले कम हो ।

गत वर्ष कम्पनीले ८ करोड ९२ लाख रुपैयाँ मुनाफा गरेको थियो । यता, युनियनले चैत मसान्तसम्म ५ अर्ब ५ करोड रुपैयाँ बिमा शुल्क आर्जन गरेको छ ।

यो गत वर्षको भन्दा ५९.३९५ ले धेरै हो । गत वर्ष यसले ३ अर्ब १७ करोड रुपैयाँ बिमा शुल्क आर्जन गरेको थियो । यसले जीवन बिमा कोष पनि ३ अर्ब ६८ करोड रुपैयाँबाट बढाएर ६ अर्ब ९० करोड रुपैयाँ पुर्याएको छ । युनियनले महाविपत्ति कोषमा ८ करोड ११ लाख रुपैयाँ छुट्याएको छ ।

हाल यस इन्स्योरेन्सको चुक्ता पुँजी १ अर्ब ५० करोड ५० लाख रुपैयाँ रहेको छ । जगेडा कोषमा ७३ करोड ७ लाख रुपैयाँ छ । बिमा समितिले तोकेको न्यूनतम २ अर्ब रुपैयाँ चुक्ता पुँजी पुर्याउन कम्पनीले आइपीओ जारी गर्ने तयारी गरेको छ ।