झापामा एक सातामै बढे चार गुणा संक्रमित

२२ वैशाख,झापा । झापामा कोरोना संक्रमितको दर भने ज्यादै बढेको छ । एक सातामा चार गुणा संक्रमित बढेको सरकारी तथ्याङ्कले देखाएको छ । जिल्ला स्वास्थ्य कार्यालय झापाका फोकल पर्सन जीवन चौलागाईंका अनुसार सात दिनअघि वैशाख १४ गते जिल्लामा संक्रमितको सङ्ख्या १९५ रहेको थियो । तर मङ्गलबार यो सङ्ख्या बढेर ७४१ पुगिसकेको छ । यो साता ५४६ जना संक्मित बढेका हुन् ।

करीब एक महिनाअघि झापामा कोभिड–१९ को दोस्रो लहरबाट प्रभावित संक्रमितहरु देखा पर्न थालेका थिए । त्यसयता लगातार गुणात्मक रुपमा संक्रमण फैलिइरहेको छ । एक महिनाअघि जिल्ला स्वास्थ्य कार्यालयले झापामा संक्रमितको सङ्ख्या मात्र १३ रहेको जनाएको थियो ।

विगत सात दिनमा संक्रमण निकै फैलिएको छ । खुला सीमा भएकाले भारतबाट आउने र काठमाडौँबाट घर फर्किनेको सङ्ख्या बढेसँगै झापामा संक्रमण फैलिएको हो । झापामा गत वर्ष कोरोनाको पहिलो लहर शुरु भएयता १३६ जनाको यही संक्रमणबाट मृत्यु भएको छ ।