संसदीय दलको नेतामा ठाकुर र महतो दुवैको दावीले ओली थप अप्ठ्यारोमा

२३ बैशाख, काठमाडौं । जनता समाजवादी दल (जसपा) को संसदीय दलको नेतामा तत्कालीन  राजपाका महन्थ ठाकुर र राजेन्द्र महतो दुवैले दावी गरेपछि उनीहरुलाई टेको बनाउँदै विश्वास मत लिने निर्णयमा पुगेका प्रधानमन्त्री केपी ओली थप अप्ठ्यारोमा परेका छन् ।

जसपा नेता ठाकुर संसदीय दलको नेता बन्नेगरी हस्ताक्षर अभियानमा जुटेको सूचना पाएपछि यता अर्का  नेता महतो झस्किएका हुन । महतोले ओलीलाई साथ दिने विषयमा सहमत भएपनि ठाकुरलाई दलको नेतामा साथ दिन नसक्ने बताएका छन् । जसका कारण प्रधानमन्त्री ओलीलाई सघाउनका लागि सुरु गरेको हस्ताक्षर अभियान नै रोकिएको जसपा नेताहरुले बताएका छन् ।

जसपाका अध्यक्ष ठाकुरले प्रधानमन्त्री ओलीलाई साथ दिने सम्वन्धमा राजधानीमा उपलब्ध आफ्नो पक्षका सांसदहरुलाई हस्ताक्षर गराएपनि त्यसमा ओलीलाई साथ दिने विषयमा सारथी मानिएका राजेन्द्र महतो र शरद्सिंह भण्डारी लगायतका नेताहरु हस्ताक्षर गर्न इन्कार गरेका छन् ।

संसदीय दलको नेताका लागि महतो र ठाकुरबीच दन्द्वको लाभ भने उपेन्द्र यादवलाई हुने देखिएको छ । ठाकुर र महतोको दुवैले संसदीय दलको नेता बन्ने आकाक्षा राख्दा कार्यकारणी समितिमा बहुमतमा रहेका यादव संसदीय दलमा पनि बहुमतमा रहने भएका हुन । जसपाको संसदीय दलको नेताका लागि महन्थ ठाकुर र राजेन्द्र महतले दुवैले दावी कायम राखेपछि दलको नेतामा उपेन्द्रको संभावना बलियो बनेको हो ।

प्रधानमन्त्री ओलीको आडमा संसदीय दलको नेता बन्न महतोले महन्थ ठाकुरको साथ खोजेका छन् । तर, ठाकुरले हालसम्म साथ दिने प्रतिवद्धता जनाएका छैनन् । संसदीय दलको नेता बनाउने निश्चित नभएसम्म ओलीलाई समर्थन गर्ने विषयमा हस्ताक्षर नगर्ने अडानमा महतो रहेपछि ओली थप अप्ठ्यारोमा परेका हुन । यसै बीच पार्टीमा केही संसदहरुले भने कोही कतै पनि साथ नलगी जसपा ततटस्ट बस्नुपर्ने पार्टीलाई फुटबाट जोगाउनु पर्ने मध्यमार्गी धारणा बाहिर ल्याएका छन ।