दबाबमा परेका ओली नयाँ रणनीति बनाउँदै

२३ बैशाख, काठमाडौं । वैशाख २७ गते प्रतिनिधिसभामा विश्वासको मत लिने निर्णय गरेका प्रधानमन्त्री केपी ओली नसोचेको अफ्ठेरोमा परेका छन् । उनले सोचे भन्दा भिन्नखाले राजनीतिक परिदृश्य निर्माण भएपछि आगामी रणनीतिसमेत बदल्ने निश्चयमा पुगेको देखिन्छ । पार्टी भित्रको माधवकुमार नेपाल पक्ष वाध्य भएर आफूलाई सघाउन तयार हुने उनको अनुमान यतिबेला गलत साबित हुँदैछ ।

पार्टी भित्र समानान्तर संगठन चलाइरहेका नेपाल पक्षका नेता कार्यकर्तालाई ठेगान लगाउने उद्येश्यले विश्वासको मत लिने प्रपञ्च रचेको छताछुल्ल भएको छ । त्यसैले नेपाल पक्षले बरु सांसद पदबाटै राजीनामा दिने तयारी गरेकाले ओली अफ्ठेरोमा परेका हुन् । ओली चाहन्थे–विश्वासको मतमार्फत नेपाललगायत केही नेताको राजनीतिक जीवन समाप्त हुनेछ । या त मत दिन्छन्, नत्र फ्लोर क्रस गर्छन् भन्ने अनुमान ओलीको थियो ।

तर नेपाल पक्षले उल्टो राजीनामा नै गर्ने सोच बनायो । यसबाट ओली हच्केका छन् । हिजो र अस्ती नेपालले विपक्षीहरुसँग गरेको भेटघाट र छलफलबाट ओली अझै झस्किएका छन् । प्रमुख प्रतिपक्षी दल नेपाली कांग्रेसका सभापति शेरबहादुर देउवालगायत माओवादी अध्यक्ष पुष्पकमल दाहाल प्रचण्ड र जनता समाजवादी दलका अध्यक्ष उपेन्द्र यादवसँग नेता नेपालले गरेको गोप्य भेलाले ओली पक्ष दबाबमा परेको छ ।

यति मात्र होइन, विपक्षीहरुसँग मिलेर नेता नेपालले जेठ ६ गते हुन गइरहेको राष्ट्रियसभाको उप निर्वाचनमा आफू पक्षकै डा. खिमलाल देवकोटालाई उमेदवार बनाउन सफल भएका छन् । ओलीले पार्टीका तर्फबाट उठाएका पूर्व माओवादी नेता रामबहादुर थापा बादल रहेका छन् । एमाले कार्यकर्ताले बादललाई भन्दा देवकोटालाई नै मत हाल्ने सम्भावना बढी रहेको ओलीलाई राम्रो हेक्का छ । यो प्रकरणले ओली केही हच्किएकै हुन् । त्यही भएर ओली हिजै साँझ काँग्रेस सभापति देउवाको दैलो चाहर्न पुगे । विश्वासको मत नै मागे । तर देउवाले विपक्षी धर्म निभाउने प्रतिवद्धता जनाए ।

माधव नेपाललाई फकाउने वा मिलाउने पक्षमा ओली पटक्कै छैनन् । त्यसैले उनी बूढानिलकण्ठ धाउन तयार भए , तर नेपालसँग सम्बाद गर्न इच्छुक भएनन् । प्रधानमन्त्री ओलीले नसोचेको अर्काे राजनीतिक परिघटना देखियो । त्यो के भन्दा जसपा भित्रको खेलोफड्को । उनलाई जसपाको सिंगो मत नआएपनि कम्तिमा १५ मत प्राप्त हुने विश्वास थियो । महन्थ ठाकुरले त्यो विश्वास दिलाएका थिए । ठाकुरसँगै राजेन्द्र महतो पनि ओलीकै पक्षमा थिए ।

तर पछिल्लो दिन आफू पक्षीय सांसद् र कार्यकारिणी परिषद सदस्यको हस्ताक्षर संकलन अभियानमा ठाकुर कमजोर देखिएका छन् । हस्ताक्षर अभियानमा स्वयं महतोले नै साथ दिएका छैनन् । किनभने ठाकुरले महतोलाई संसदीय दलको नेताको ग्यारेण्टी गरेका छैनन् । त्यही भएकाले महतोले नै हस्ताक्षर गरेका छैनन् । उता, शरत्सिं भण्डारी र निर्जला राउतले पनि ठाकुरको खाली कागजमा हस्ताक्षर गर्न मानेका छैनन् ।

अब ठाकुरसँग मुश्किलले १० जना सांसद रहेको अवस्था छ । त्यसैले ओलीलाई सरकार जोगाउन सहज छैन । तर उनको जोड भने सरकार ढले पनि अर्ली इलेक्सनमै लैजाने रहेको छ । त्यसका लागि उनी नेपाली कांग्रेस र जसपाको साथ खोज्दैछन् । कांग्रेस तयार भएपनि जसपाले भने त्यस्तो निर्णय गराउने सम्भावना न्यून रहेको छ । यो परिवेशमा अब कसरी अगाडि बढ्ने भन्ने चिन्ता ओली पक्षलाई थपिएको छ । यसै सन्दर्भमा छलफल गर्न ओलीले अहिले बालुवाटारमा स्थायी कमिटी बैठक राखेका छन् । माधव नेपाल पक्ष नरहेको उक्त बैठकले नयाँ रणनीति तयार गर्ने अनुमान गरिएको छ ।