मृत्युदर बढेपछि प्रदेशसँग शववाहन मागिँदै

२३ वैशाख,काभ्रेपलाञ्चोक । कोरोना संक्रमणबाट यहाँ दैनिक मृत्यु हुन थालेपछि शव व्यवस्थापनका लागि जिल्लास्थित कोभिड–१९ संक्रमण नियन्त्रण, रोकथाम र उपचारसम्बन्धी केन्द्र (डिसीसीएमसी)ले वाग्मती प्रदेशस्थित कोभिड–१९ सङ्कट व्यवस्थापन केन्द्र मकवानपुरमा शवबाहन मागिने भएको छ ।

केन्द्रको बैठकले कोभिड–१९ को दोस्रो लहरबाट मृत्यु भएकासमेतको शव व्यवस्थापन हालसम्म नेपाली सेनाले आफ्नै व्यवस्थापनमा गर्ने गरेको र काभ्रेपलाञ्चोकमा निजीस्तर, सरकारी तथा स्थानीय तहमा शवबाहन नभएको हुँदा प्रदेशस्तरीय कोभिड–१९ सङ्कट व्यवस्थापन केन्द्र मकवानपुरसँग शवबाहन माग्ने निर्णय गरेको हो । “दैनिक दुईभन्दा माथिको सङ्ख्यामा मृत्यु हुन थालेको छ, जिल्लामा शवबाहन नहुँदा प्रदेशमा माग्न लागेका हौँ”, केन्द्रका सदस्यसचिव एवं जिल्ला स्वास्थ्य कार्यालय प्रमुख डा नरेन्द्र झाले भने । उनका अनुसार केन्द्र मातहत रहने गरी हाललाई एक थान शवबाहन मागिएको हो ।

केन्द्रका अनुसार कोरोना संक्रमणबाट अस्पतालमा उपचाररत काभ्रेपलाञ्चोकमा बुधबार चार र मङ्गलबार सात तथा सोमबार दुईको मृत्यु भएको थियो । पछिल्लो घटना विवरणअनुसार कोरोना संक्रमण भएको थाहा नभई घरमै बसेर शारीरिक अवस्था निकै कमजोर भएर आएकाको अस्पताल आएको एकै दिनमा मृत्यु हुने गरेको केन्द्रले जनायो । “उपचारका लागि ढिलाइ गर्दा परीक्षणपछि उपचार गर्न नपाउँदै मृत्यु भएको पाइयो”, केन्द्रका सदस्यसचिव डा झाले भने । उनका अनुसार जिल्लामा ‘कन्ट्याक्ट ट्रेसिङ’को दायरा बढाउन लागिएको छ ।

केन्द्रका अनुसार पछिल्लो २४ घण्टामा जिल्लामा १५८ मा कोरोना संक्रमण पुष्टि भएको छ । अघिल्लो दिन जिल्लामा ८२ जनामा संक्रमण पुष्टि भएको थियो । कोरोना संक्रमणको दोस्रो लहर शुरु भएयता हालसम्म यहाँका कूल ७६८ संक्रमितमध्ये बनेपा नगरपालिकामा ३०१, धुलिखेलमा १५८, पनौतीमा १५०, पाँचखालमा ६०, नमोबुद्धमा २८, मण्डनदेउपुरमा १९ तथा रोशी गाउँपालिकामा १५, चौँरीदेउरालीमा सात, तेमालमा छ र भुम्लुमा सात, खानीखोलामा दुई, बेथानचोकमा १२ र महाभारत गाउँपालिकामा तीन सक्रिय संक्रमित रहेका छन् ।

जिल्लामा सबैभन्दा बढी बनेपामा ३९ दशमलव १९ प्रतिशत संक्रमित रहेका छन् । केन्द्रका अनुसार संक्रमितमध्ये ७४३ होमआइसोलेशन तथा २५ जना अस्पतालको आइसोलेशनमा उपचाररत छन् । हालसम्म जिल्लामा ५६ कोरोना संक्रमितको मृत्यु भएको छ ।