ओली हान्निए शीतलनिवास

२३ बैशाख, काठमाडौं । प्रधानमन्त्री केपी ओली बालुवाटारमा आयोजित पार्टी स्थायी कमिटी बैठक सकिए लगत्तै राष्ट्रपति निवास शीतलनिवास हान्निएका छन् । प्रधानमन्त्री ओली जब जब शीतलनिवास जान्छन्, केही न केही अनिष्ट भएकै हुन्छ । आज पनि उनले के अनिष्ट गर्ने हुन् भन्ने चिन्ता राजनीतिक वृत्तमा सुरु भएको छ ।

वैशाख २७ गते उनले प्रतिनिधिसभाबाट विश्वासको मत लिन चाहेका छन् । तर परिस्थिति उनी प्रतिकुल देखिएको छ । ओलीलाई जनता समाजवादी पार्टीको महन्थ ठाकुर पक्षले मत दिने भनिएपनि सहज छैन । बहुमत सदस्य ठाकुरविरुद्ध उभिएका छन् ।

त्यस्तै आफ्नै पार्टीका माधव नेपाल पक्षले पनि ओलीलाई सघाउने अवस्था देखिंदैन । ओलीले पनि नेपाल पक्षसँग संवाद गर्नुभन्दा दुत्कारेरै अगाडि बढ्ने संकेत गरेका छन् । यसैका लागि उनले आज बिहान आकस्मिक रुपमा स्थायी कमिटी बैठक डाकेका थिए । बैठक भर्खरै सकिएको छ ।

बैठकमा आसन्न राष्ट्रियसभा निर्वाचनमा कसरी अगाडि बढ्ने भन्नेमै छलफल केन्द्रित रहेको बताइएपनि आन्तरिक विषय भने खुलाइएको छैन । तर कुनै नयाँ रणनीति तयार गर्नेगरी बसेको भनिएको स्थायी कमिटी बैठकले गरेको निर्णय राष्ट्रपतिसँगको भेटपछि मात्रै उजागर हुने अनुमान गरिएको छ ।