फेरि दल विभाजनको अध्यादेश आउने

२३ बैशाख, काठमाडौं । प्रधानमन्त्री केपी ओली संसदमा प्रष्ट अल्पमतमा छन् । त्यसैले उनी संसद्बारा विधेयक पास गरेर भन्दा अध्यादेशबाटै आफ्ना चाहना पूरा गर्न अभिशप्त छन् । वर्षे अधिवेशनको मुखैमा उनी भटाभट अध्यादेश ल्याउन हतारिएका छन् । तीन दिनअघि मात्रै उनले सातवटा अध्यादेश जारी गराएका छन् । आज पनि ओलीको दौडधूप अर्काे अध्यादेश जारी गराउनकै लागि भएको स्रोतको भनाई छ ।

आफ्नो सरकारलाई सहयोग गर्न तयार भएको जनता समाजवादी दलको महन्थ ठाकुर पक्ष पार्टी भित्र अल्पमतमा परेकाले फेरि राजनीतिक दल विभाजन सम्बन्धी अध्यादेश जारी गर्न हतारिएका छन् । यथास्थितिमा ओलीलाई सहयोग गर्ने हैसियत गुमाइसकेको जसपाको ठाकुर पक्षकै चाहनामा ओलीले यस्तो कदम उठाउन लागेको स्रोतको दाबी छ ।

जसपा भित्र ठाकुर पक्षसँग मुश्किलले एक दर्जन सांसद् पुगेको अवस्था छ । ओलीलाई सहयोग गर्न उनीहरुले दल विभाजन गर्नै पर्ने वाध्यता रहेको छ । त्यसैले प्रधानमन्त्रीले सहयोग गर्नेका लागि बाटो फुकाइदिन यस्तो कदम चाल्न थालेको बताइएको छ । यसै प्रयोजनका लागि ओलीले आज दिउँसो राष्ट्रपति विद्यादेवी भण्डारीलाई भेटिसकेका छन् । साँझ ५ बजे अध्यादेश जारी गर्नकै लागि क्याबिनेट मिटिङ डाकिएको हो–स्रोत भन्छ ।

तर यस्तो अध्यादेश जारी हुँदा एमालेकै माधव नेपाल पक्षलाई समेत फाइदा पुग्न सक्ने अवस्था देखिन्छ । अध्यादेशमा पार्टी विभाजनका लागि संसदीय दल वा केन्द्रीय कमिटीमा ४० प्रतिसत मत जुटाउनुपर्ने व्यवस्था गर्न लागिएको स्रोतको दाबी छ । त्यस्तो अवस्थामा माधव नेपाल पक्षले दुई मध्ये एक ठाउँमा ४० प्रतिसत संख्या पु¥याउन सक्ने अवस्था रहेको पनि बताइन्छ ।