प्रधानमन्त्री ओलीको प्रस्ताव राष्ट्रपतिले नेता नेपालसँग राखेपछि…

२४ बैशाख, काठमाडौं । प्रधानमन्त्री केपी शर्मा ओलीको आग्रहमा राष्ट्रपति विध्यादेवी भण्डारीले एमालेका बरिष्ट नेता माधव कुमार नेपालसँग विशेष प्रस्ताव राखेको खुलासा भएको छ ।

सत्तारूढ एमालेभित्रको विवाद उत्कर्षमा पुगेका बेला पार्टी अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार अलगअलग भेट गरेकी राष्ट्रपति भण्डारीले प्रधानमन्त्री ओलीको आग्रहमा नेपाललाई विभाजनमा नजान र  पार्टीको नेतृत्व लिन प्रस्ताव गरेकी हुन ।

यसअघि राष्ट्रपति भण्डारीले पटकपटक बोलाउँदा पनि राष्ट्रपति कार्यालय नगएका नेता नेपाल बिहीबार साँझ त्यहाँ गएका थिए । भेटमा पार्टीभित्रको विवादका बारेमा कुराकानी भएको बताइको छ ।

नेता नेपालसँग भएको भेटमा राष्ट्रपतिले    पार्टीलाइ यो उचाईमा ल्याउन नेपालको भूमिकाको चर्चा गर्दै विभाजनमातर्फ नजान र आगामी अधिवेशनपछि पार्टीको नेतृत्वको लागि तयार रहन ओलीको प्रस्ताव नेता नेपाल समक्ष राखेको नेपाल निकट नेताले बताएका छन्  ।

नेता नेपालले पार्टीको विवाद मिलाउन ओलीले गरेका निर्णय सच्याउनुपर्ने बताएका थिए। विपक्षी दलका नेता शेरबहादुर देउवालाई भेटेर फर्किने क्रममा नेपाल शीतल निवास पसेका थिए।

नेता नेपालको प्रतिउत्तरबारे जानकारी लिन प्रधानमन्त्री ओली नेता नेपाल शीतल निवासबाट बाहिरिएलगत्तै ओली त्यहाँ पुगेका थिए। स्थायी कमिटी बैठक सकिएपछि दिउँसो शीतल निवास गएका ओली साँझ पनि राष्ट्रपतिलाई भेट्न पुगेका हुन ।