आईपीओमा गरेको एक हजार लगानी डेढ महिनामै भयो पचास हजार बढि

२४ बैशाख, काठमाडौं । नेप्सेमा चैत ३ गतेदेखि कारोबार सुरु भएको महिला लघुवित्त कम्पनीको प्रतिकित्ता शेयरमूल्य ५ हजार ३० रुपैयाँ पुगेको छ । करिब साढे २ महिना अघि मात्रै लघुवित्तले सर्बसाधारणमा आइपीओ बिक्री गरेको थियो ।

कम्पनीले गोलाप्रथाद्वारा १० कित्ताको दरले आईपीओ बाँडफाँड गरेको हो । कम्पनीको दश कित्ता पाउने लगानीकर्ताको एक हजारको लगानी शुक्रबारसम्म ५० हजार रुपैयाँ पुगेको छ । पछिल्ला दिनहरुमा कम्पनीको शेयरमूल्य दैनिक सकारात्मक सर्किट लेभलमा कारोबार हुँदै आएको छ।

सर्वसाधारणमा ४ लाख कित्ता मात्रै आइपीओ निश्काशन गरेको लघुवित्तको दोस्रो बजारमा आपुर्ति कम छ। थोरै कित्ता शेयर सूचीकृत भएको र वित्तीय अवस्था समेत राम्रो रहेको कारण पनि लघुवित्तको शेयरमूल्य दैनिक रुपमा बढ्दै गइरहेको लगानीकर्ताहरु बताउँछन्।

नेप्सेले महिला लघुवित्तको शेयरलाई ३१३ रुपैयाँ १६ पैसादेखि ९३९ रुपैयाँ ४८ पैसा ओपनिङ्ग रेन्ज दिएको थियो।त्यस अनुसार लघुवित्तको पहिलो कारोबार प्रतिकित्ता ४३८ रुपैयाँ १० कित्ता शेयर खरिदबिक्री भएको थियो। कारोबार खुलेदेखि नै लघुवित्तको शेयर निरन्तर उकालो लाग्दै आइरहेको छ।

बिहीबार कारोबार खुलेको केहि समयमा नै लघुवित्तको शेयरमूल्य ९.९९ प्रतिशत अर्थात प्रतिकित्ता ४५७ रूपैयाँले बढेर ५ हजार ३० रुपैयाँ पुगेको छ।

पछिल्लो समय आईपीओमा लगानीकर्ताको आकर्षण बढ्दो क्रममा छ। आइपीओ निष्कासन गर्ने हरेक कम्पनीमा आवेदनको नयाँ रेकर्ड कायम हुँदै आएको छ। डिम्याट खाता खोल्ने लगानीकर्ताको सँख्या ३५ लाख २४ हजार भन्दा धेरै भइसकेको छ।

तेस्रो त्रैमासमा यस्तो देखियो लघुवित्तको वित्तीय अवस्था ?

चालु आर्थिक वर्षको तेस्रो त्रैमासको वित्तीय विवरण अनुसार चैत मशान्तसम्ममा लघुवित्तले ६ करोड ४२ लाख रुपैयाँ मुनाफा आर्जन गरेको छ। गत आर्थिक वर्षको यसै अवधिमा ३ करोड २ लाख रुपैयाँ मुनाफा गरेको लघुवित्तले यस अवधिमा ११२.५५ प्रतिशतले मुनाफा बढाएको छ।

लघुत्तिको प्रतिशेयर आम्दानी ८५ रुपैयाँ ६६ पैसा छ। गत वर्षको चैत मशान्तसम्ममा ७६ रुपैयाँ रहेको प्रतिशेयर अनाम्दानी यस अवधिमा १८ रुपैयाँले बढाएको हो। उसको प्रतिशेयर नेटवर्थ २९१ रुपैयाँ छ।