प्रचण्ड र देउवाबीच भेटवार्ता

२४ बैशाख, काठमाडौं । नेपाली कांग्रेसका नेता शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’बीच भेटवार्ता भएको छ ।शुक्रबार साँझ प्रचण्ड देउवालाई भेट्न बुढानिलकण्ठ पुगेका हुन् । उनीहरुबीच करिव आधा घण्टा भेटवार्ता भएको बताइएको छ ।

प्रधानमन्त्री केपी ओलीले विश्वासको मत लिने  निर्णय गरेकाले राष्ट्रियसभा सदस्य पदको उपनिर्वाचन र नयाँ सरकार गठनका लागि नेताहरुको दौडधूप बढेको छ । प्रमुख राजनीतिक दलका नेताहरुले आफ्नै पार्टी तथा अन्तर पार्टीका नेताहरूसँगको भेटवार्तालाई तीव्र बनाएका छन् ।

यसअघि हिजो एमाले नेता माधवकुमार नेपाल पनि बुढानिलकण्ठ पुगेर देउवालाई भेटेका थिए भने अस्ति प्रधानमन्त्री ओलीले २२ वैशाखमा एमाले नेताहरसहित बूढानीलकण्ठ पुगेर देउवालाई भेटेका थिए। उनले देउवासँग विश्वासको मत दिन अपिल गरेका थिए। तर, देउवासहितका कांग्रेस नेताहरूले प्रधानमन्त्रीलाई विश्वासको मत दिन नसकिने बताएका थिए।