भीरकोट नगरपालिकामा अक्सिजनसहितको २० बेड तयार: नगरप्रमुख खनाल

२५ बैशाख, स्याङ्जा । नयाँ भेरियण्टसहितको कोरोना संक्रमण नियन्त्रण र व्यवस्थापनमा जुटेको भीरकोट नगरपालिकाले हेलुस्थित अस्पतालमा अक्सिजनसहितको २० वटा बेड तयार पारेको छ । नयाँ व्यवस्थापनसहित २० वटा बेड सञ्चालनको अन्तिम तयारीमा रहेको भीरकोट नगरपालिकाका प्रमुख छाँयाराम खनालले बताए।

भीरकोट नगरपालिकामा नगरपालिकाले गरेको परिक्षणबाट २४ जना र आफै वालिङ, पोखरा र काठमाडौंमा उपचारको क्रममा परीक्षणबाट पत्ता लागेका १३ जना गरि ३७ जना सक्रिय संक्रमित रहेका छन् । उनीहरु मध्ये दुईजना अस्पतालमा उपचाररत छन् भने अन्य सबै होम आइसोलेशनमा स्वास्थ्यलाभ गरिरहेको भीरकोट नगरपालिकाको स्वास्थ्य शाखाका प्रमुख नारायणवन्धु अर्यालले जानकारी दिएका छन् ।

संक्रमितको संख्या बढ्दै जान थालेपछि व्यवस्थापनमा जुटेको नगरपालिकाले अस्पतालमा रहेका ६० वटा साना ठूला अक्सिजनको सिलिण्डरलाई प्रयोगमा ल्याउने अन्तिम तयारी थालेको छ । ६० मध्ये नियमित प्रयोगमा रहेका १० वटा अक्सिजन सिलिण्डर कोरोना संक्रमितलाई प्रयोग गर्न नसकिने भएपछि हाललाई २० वटा अक्सिजनसहितको बेड र दुई जना चिकित्सकसहित १० जना जनशक्ति कोरोना उपचारका लागि व्यवस्थापन गरिएको नगरप्रमुख खनालले जानकारी दिए ।

रोग नियन्त्रण र हाल बढिरहेको संक्रमणको चेनब्रेक गर्न नगरपालिका क्षेत्रलाई निषेधाज्ञा घोषणा गरी संक्रमितको पहिचान र व्यवस्थापनमा लागेको नगरपालिकाले पहिलो चेनब्रेक गर्न नगरपालिकाको स्वास्थ्य शाखाको सम्पूर्ण संयन्त्र, जनप्रतिनिधि र स्थानीय प्रशासन र सुरक्षाकर्मी परिचालन गरेको जनाएको छ भने समुदायस्तरबाट पनि विभिन्न संघसंस्था र टोलविकास संस्थाले नगरपालिकालाई सघाउ पुर्‍याइरहेको नगरप्रमुख खनालले जानकारी दिएका छन् ।

उनका अनुसार नगरपालिका भित्रका टोल विकास संस्थाका अध्यक्षलाई आफ्नो टोलको अवस्थाको बारेमा नियमित स्वास्थ्य शाखा र जनप्रतिनिधिलाई सम्पर्क गर्न, उनीहरुलाई मासिक रु तीनसय संचार खर्च समेत व्यवस्था गरी संक्रमण नियन्त्रणका लागि छुट्टै खालको प्रयास थालनी गरिएको छ, जुन निकै प्रभावकारी रहेको समेत उनले जानकारी दिए ।

आफ्ना नगरबासी उपचारबाट वञ्चित हुन नपरोस र उपचार नपाएर कुनैपनि नागरिकको ज्यान खतरामा नपरोस भनेर नगरपालिकाको सम्पूर्ण स्रोत साधन परिचालन गरिएको समेत उनले बताए । हालसम्म देशका विभिन्न ठाँउमा भीरकोट नगरपालिका घर भएका बाहिर उपचारमा रहँदा ज्यान गुमाउनेको संख्या २ जना रहेको समेत नगरपालिकाले जानकारी दिएको छ ।