नेपाल-खनाल पक्ष राजीनामा दिन तयार, ओलीको पदमुक्त हुने सम्भावना

२६ बैशाख, काठमाडाैं ।  प्रधानमन्त्री केपी ओलीले विश्वासको मत लिनु अघिल्लो दिन अर्थात् बैशाख २६ मै माधवकुमार नेपाल समूहले सांसद पदबाट राजीनामा दिने अन्तिम तयारी गरेको छ । पार्टी अध्यक्ष ओलीसँग आइतबार पनि एकताको लागि एकचोटि प्रयास गर्ने र भएन भने आइतबार नै राजीनामा दिनेगरी यो पक्षले तयारी थालेको हो ।

नेता भीम रावलसहित केही नेताले वरिष्ठ नेता माधवकुमार नेपाललाई हस्ताक्षरसमेत बुझाइसकेका छन । उनले नेपाल खनाल पक्षका सबै सांसद राजिनामा दिन मञ्जुर भएर हस्ताक्षर गरेको बताए । तर सबैले राजिनामा दिने वा प्रत्यक्ष निर्वाचितहरुले मात्र दिने भन्नेबारे भने आइतबार आजै मात्र टुंगो लाग्ने छ ।

नेपाली कांग्रेसले ओलीलाई प्रधानमन्त्रीबाट हटाउन निर्णायक भूमिका रहेको नेपाल खनाल पक्षले राजिनामा दिने भए मात्र ओलीलाई हटाउने योजना सफल हुनसक्ने भन्दै राजिनामा गरेर बैकल्पिक सरकार बनाउन तयार हुन आग्रह गरेको थियो ।  माओवादीले समेत यहि अडान राखेपनि नेपाल खनाल पक्ष राजिनामा दिने निर्णयमा पुगेको हो । प्रधानमन्त्री केपी ओलीले नेपाल पक्षका युवा नेताहरुसँग बेलाबेग्लै बार्ता गरि नेपाल खनाल पक्षलाई टुटाउने कोशिस गरेको भन्दै यो पक्ष ओलीसँग थप रुष्ट बनेको छ ।

प्रधानमन्त्री ओलीले वैशाख २७ गते सदनबाट विश्वासको मत लिँदैछन् । अहिले पनि अल्पमतमा रहेका ओली नेपाल-खनाल पक्षले राजीनामा दिएको खण्डमा पदमुक्त हुने सम्भावना बढ्नेछ । यता कांग्रेस र माओवादीले विश्वासको मत नदिने निर्णय गरिसकेको अवस्थामा नेपाल-खनाल पक्षले राजीनामा दिए वैकल्पिक सरकार बन्ने सम्भावना बढ्छ । नेपाल-खनाल पक्षले ०७५ जेठ २ मै फर्किनुपर्ने अडान राख्दै आएको छ भने ०७७ फागुन २८ यता भएका सबै निर्णय रद्द हुनुपर्ने माग दोहोर्‍याइरहेको छ ।

शनिवार ओली इतर समूहका प्रतिनिधि सभा सदस्यहरूको बैठक बसेको थियो । जहाँ माधवकुमार नेपाल, भीम रावल र घनश्याम भुसालसहित प्रतिनिधिसभाका सदस्यहरू सहभागी भएका थिए । यसबीचमा तह-तहमा भएका वार्तामा संसदीय दलका नेता एवं प्रधानमन्त्री ओलीसँग सहमति बन्न नसकेपछि उनीहरू राजीनामा दिने तयारीमा पुगेका हुन् । आइतबार पनि बिहान स्थायी कमिटिको बैठक बस्ने तय भइसकेको छ ।