लुम्विनी प्रदेशका मुख्यमन्त्री पोखरेलविरुद्ध पुन: अविश्वासको प्रस्ताव दर्ता

२६ वैशाख, काठमाडौं । लुम्बिनी प्रदेशका मुख्यमन्त्री शंकर पोखरेलविरुद्ध फेरी अविश्वासको प्रस्ताव दर्ता भएको छ । नेपाली कांग्रेस, नेकपा माओवादी केन्द्र, जनता समाजवादी पार्टी र राष्ट्रिय जनमोर्चाका ४० प्रदेशसभा सदस्यको हस्ताक्षरसहित प्रदेशसभा सचिवालयमा अविश्वास प्रस्ताव दर्ता गरिएकाे हाे ।

प्रदेश प्रमुखले दलहरुसँग परामर्श नगरी संविधान विपरित बहुमत नभएको अवस्थामा पोखरेललाई मुख्यमन्त्री नियुक्त गरेकाले  प्रदेशसभामा फेरि अविश्वासको प्रस्ताव दर्ता  गर्नुपरेको नेताहरुले बताएका छन् । उनीहरुले माओवादी संसदीय दलका नेता केसीलाई मुख्यमन्त्रीका रुपमा प्रस्ताव गरेका छन् ।

प्रस्तावमा ४० जनाको हस्ताक्षर गरेका छन् । ८७ सदस्यीय रहेको प्रदेशसभामा कारवाही राजीनामा लगायतका प्रकरणबाट हाल ७९ सदस्य कायम रहेका छन् । यस अवस्थमा नयाँ सरकार गठनका लागि  ४० प्रदेशसभामा बहुमत संख्या हो ।

यसअघि ६ वैशाखमा पनि मुख्यमन्त्री पोखरेलविरुद्ध अविश्वासको प्रस्ताव दर्ता भएको थियो तर अधिवेशन सुरु हुनु अघि नै पोखरेलले मुख्यमन्त्री पदबाट राजीनामा दिएर पुन मुख्यमन्त्री नियुक्ति भएका थिए ।

अविश्वासको प्रस्ताव दर्ता गरेका दलहरुले आफूहरुको पक्षमा बहुमत भएको दाबी गरेपनि प्रदेश प्रमुख धर्मनाथ यादवले पोखरेललाई नै मुख्यमन्त्री नियुक्त र शपथ खुवाएपछि पोख्रेल विरुद्ध विपक्षीले मोर्चा कस्दै आएका थिए ।